រដ្ឋមន្ត្រីក្រសួងព័ត៌មាន ប្រតិកម្មចំពោះក្រុមបាតុករ ដែលឡោមព័ទ្ធអ្នកយកព័ត៌មានទូរទស្សន៍ជាតិ
ភ្នំពេញ៖ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរបស់រាជរដ្ឋាភិបាល បានប្រតិកម្មតាមរយៈបណ្តាញសង្គម Facebook ចំពោះក្រុមបាតុកររបស់គណបក្សសង្គ្រោះជាតិ ដែលឡោមព័ទ្ធ និងបណ្តេញ អ្នកយកព័ត៌មានរបស់ទូរទស្សន៍ជាតិ ក្នុងទិវាសិទ្ធិមនុស្ស ១០ធ្នូ ខួបលើកទី ៦៥ នៅឯទីលានប្រជាធិបតេយ្យ ក្បែររមណីយដ្ឋានវត្តភ្នំ។
ប្រភពព័ត៌មានក្នុងបណ្តាញសង្គមហេ្វសបុក (facebook) ដែលឯកឧត្តមរដ្ឋមន្ត្រី បានសរសេរបង្ហោះលើ Account របស់លោក ឈ្មោះ Kanharith Khieu នៅព្រឹកមិញថា៖ «ទាមទារ ឱ្យគេផ្សាយពីខ្លួន (គណបក្ស សង្គ្រោះជាតិ) ដល់ទូរទស្សន៍ជាតិ (ទទក) ចុះទៅរាយការណ៍ព័ត៌មានបែរជាសន្តិសុខរបស់ខ្លួន ដេញវាយអ្នកយកព័ត៌មានឆ្កែឆ្មា អីលូវនេះ សូមកុំបន្ទោសគេរឿងមិនផ្សាយ។
យ៉ាងណាមិញនោះ បើយោងតាមគេហទំព័របណ្តាញសង្គមហ្វេសបុករបស់លោក កឹម គុណវឌ្ឍ អគ្គនាយកទូរទស្សន៍ជាតិកម្ពុជាវិញ បានបញ្ជាក់ថា អ្នកយកព័ត៌មានទូរទស្សន៍ជាតិ ដែលរងគ្រោះ មានឈ្មោះ សេង ចាន់ បានទៅយកព័ត៌មាន នៅទីលានប្រជាធិបតេយ្យ ស្របពេលដែលគណបក្សសង្គ្រោះជាតិ ប្រារព្ធទិវាសិទ្ធិមនុស្ស។
គួរបញ្ជាក់ថា នៅកាលពីព្រឹកថ្ងៃទី ១០ ធ្នូ នេះទិវាសិទ្ធិមនុស្សអន្តរជាតិ ១០ធ្នូ ក្រុមអង្គការសង្គមស៊ីវិល គណបក្សប្រឆាំងសង្គ្រោះជាតិ រាជរដ្ឋាភិបាលកម្ពុជា និងបណ្តាញធម្មយាត្រាសង្ឃ បានប្រារព្ធពិធីនេះនៅកន្លែងដាច់ដោយឡែកពីគ្នា ដើម្បីទាមទារឲ្យមានការគោរពសិទ្ធិមនុស្សកាន់តែប្រសើរឡើងនៅក្នុងប្រទេសកម្ពុជា៕ នាង/Cambodia News
