ការយល់ដឹងរបស់មាតាបិតាជាកត្តាចម្បងបន្ថយជំងឺគ្រុនឈាម
ភ្នំពេញ ៖ គិតមកដល់ខែវិច្ឆិកា ឆ្នាំ២០១៣ នេះ អត្រាជំងឺគ្រុនឈាមមានការថយចុះគួរឱ្យកត់សម្គាល់ ខណៈដែលរបាយការណ៍បានបង្ហាញថា ករណីស្លាប់ដោយសារជំងឺគ្រុនឈាមគិតមកដល់ខែវិច្ឆិកា ឆ្នាំ២០១៣ នេះ មានតែ៥៧នាក់ ថយចុះប្រមាណ៦៨% បើប្រៀបធៀបរយៈពេលដូចគ្នានៃឆ្នាំ២០១៣ ដែលមានអ្នកស្លាប់រហូតដល់១៧៨នាក់ ។
យ៉ាងណាក៏ដោយមន្ត្រីជំនាញបានអះអាងថា កត្តាចម្បងដែលនាំឱ្យអត្រាជំងឺគ្រុនឈាមមានការថយចុះនោះ គឺគុណភាពសេវាសុខាភិបាលរដ្ឋកាន់តែមានប្រសិទ្ធភាពគួបផ្សំនឹង ការយល់ដឹងរបស់មាតាបិតា ឬអាណាព្យាបាលដែលកាន់តែយល់ច្បាស់អំពីវិធានការការពារ និងគ្រោះថ្នាក់នៃជំងឺគ្រុនឈាម ។
ប្រធានមជ្ឈមណ្ឌលជាតិប្រយុទ្ធជំងឺគ្រុនចាញ់បារ៉ាស៊ីតសាស្ត្រ និងបាណនសាស្ត្រ លោក ច ម៉េងចួ បានមានប្រសាសន៍ឱ្យដឹងថា កម្ពុជាធ្លាប់មានផ្ទុះជំងឺគ្រុនឈាមនៅអំឡុងឆ្នាំ២០០៧ ដែល ករណីឈឺមានចំនួន៣៩.៤៦០ករណី ខណៈដែលករណីស្លាប់មានរហូតដល់៤០៤នាក់ ៕ Cambodia News
