អាំងសាន ស៊ូជីថាគ្មានបំណងសងសឹករដ្ឋាភិបាលយោធាភូមាទេ
ក្នុងដំណើរទស្សនកិច្ចរយៈពេល ៥ ថ្ងៃ ក្នុងប្រទេសអូស្ត្រាលី អ្នកស្រីអាំងសាន ស៊ូជី មេដឹកនាំនិយមលទ្ធិប្រជាធិបតេយ្យនៅប្រទេសភូមា បាននិយាយប្រាប់សោតទស្សន៍ព័ត៌មាន ABC ថាអ្នកស្រីទទួលស្គាល់ថា មានប្រជាពលរដ្ឋមួយចំនួននៅក្នុងប្រទេសភូមា នៅតែមានការពិបាកក្នុងការលើកលែងទោសឲ្យរដ្ឋាភិបាលយោធាដែលបាន ប្រើអំណាចផ្តាច់ការកាន់កាប់ប្រទេសអស់រយៈពេលជាច្រើនទសវត្សនោះ។
មេដឹកនាំ និយមលទ្ធិប្រជាធិបតេយ្យរូបនេះមានប្រសាសន៍ថា អ្នកស្រីចង់កសាងប្រទេសមួយដែលមានសន្តិភាព និងស្ថិរភាព បើទោះជាអ្នកស្រីដឹងថា មានប្រជាពលរដ្ឋជាច្រើនបានរងការជិះជាន់ និងធ្វើបាបក្រោមការកាន់កាប់អំណាចរបស់រដ្ឋាភិបាលយោធាហើយក្តី។
អ្នក ស្រី ស៊ូជី បានបន្ថែមថា អ្នកស្រីគ្មានបំណងធ្វើការសងសឹកទៅលើរដ្ឋាភិបាលយោធានោះទេ ពីព្រោះក្រុមយោធាមិនបានប្រព្រឹត្តមិនគួរគប្បីមកលើអ្នកស្រីនោះទេ នៅពេលដែលអ្នកស្រីជាប់ឃុំក្នុងផ្ទះនោះ៕ (Radio Australia)