ក្រុមបក្សពួកលោក Silvio Berlusconi បានបញ្ឆេះវិបត្តិនយោបាយធ្ងន់ធ្ងរនៅអ៊ីតាលី
ប្រទេស អ៊ីតាលីទើបបានពើបប្រទះនឹង វិបត្តិនយោបាយធ្ងន់ធ្ងរ បន្ទាប់ពីការលាលែងពីតំណែងរដ្ឋមន្រ្តីចំនួន ៥រូបដែលគំាទ្រលោកអតីតនាយករដ្ឋមន្រ្តី Silvio Berlusconi។ លោកនាយករដ្ឋមន្រ្តីបច្ចុប្បន្ន Enrico Letta បានចាត់ទុកទង្វើនេះ ថាមិនសមហេតុផល និងព្រមានថា លោកនឹងលាលែងចុះពីតំណែងដែរ ប្រសិនបើក្រុមលោក Silvio Berlusconi នៅបន្តធ្វើដូចនេះទៀតនោះ។ យ៉ាងណាក៏ដោយ និងក្រោយពីបានជួបជាមួយលោកប្រធានាធិតី Giorgio Napolitano មក លោក Letta គ្រោងនឹងដាក់សំណើសុំការផ្តល់ឆ្នោតផ្តល់សេចក្តីទុកចិត្តពីសភា។
បន្ទាប់ ពីការលាចុះចេញជាសមូហភាពពីតំណែងរដ្ឋមន្រ្តីរបស់ក្រុម អ្នកគំាទ្រលោកអតីតនាយករដ្ឋមន្រ្តី Silvio Berlusconi មក លោកនាយករដ្ឋមន្រ្តីបច្ចុប្បន្ន Enrico Letta មកពីគណបក្សប្រជាធិបតេយ្យ ព្រមទំាងគណបក្សរបស់លោកបានចាត់ទុកទង្វើរបស់រដ្ឋមន្រ្តីលាលែងទំាង ៥នាក់នោះថា ជាទង្វើគ្មានការទទួលខុសត្រូវ និងថា ជាកាយវិការមនុស្សខូច ចំពេលដែលស្ថានភាពសេចដ្ឋកិច្ចអ៊ីតាលីកំពុងត្រដរខ្យល់។ គណបក្សឆ្វេងនិយមរបស់លោក Letta ដដែលបានអះអាងថា មូលហេតុនៃការដើរចេញពីតំណែងរបស់រដ្ឋមន្រ្តីទំាង ៥រូបនោះ គឺមកពីពួកគេចង់សម្តែងការគំាទ្រចំពោះលោក Silvio Berlusconi។ លោក Berlusconi ដែលបានទទួលទោសពីបទលួចពន្ធ និងដែលអាចត្រូវបណ្តេញចេញពីសមាជិកព្រឹទ្ធសភា ព្រមទំាងលែងមានសិទ្ធិធ្វើនយោបាយទៀតផង។
យ៉ាងណាក៏ដោយ ការលាលែងរបស់រដ្ឋមន្រ្តីគំាទ្រលោក Silvio Berlusconi បានជម្រុញអ៊ីតាលីឲ្យធ្លាក់ក្នុងវិបត្តិនយោបាយជាថ្មី និងដែលអាចនំាឲ្យមានការរៀបចំបោះឆ្នោតនាពេលខាងមុខ។ ខណៈនេះ មានតែលោកប្រធានាធិតី Giorgio Napolitano តែម្នាក់ឯងគត់ដែលមានអំណាចសម្រេចចិត្តរំលាយ ឬមិនរំលាយសភា។ តែលោក Napolitano មិនចង់ធ្វើ ដោយគ្មានការអនុម័តច្បាប់ផ្តល់សេចក្តីទុកចិត្ត និងច្បាប់បោះឆ្នោតថ្មីនោះទេ។
ចំណែកខាងក្រុមគណបក្សកណ្តាលឆ្វេងនិយម ក៏ដូចជាក្រុមស្តំាកណ្តាលក៏មិនចង់ឲ្យមានការរំលាយសភាភ្លាម និងរៀបចំការបោះឆ្នោតជាថ្មីនាពេលឆាប់ៗនេះដែរ។ ដូច្នេះ លោកនាយករដ្ឋមន្រ្តីបច្ចុប្បន្ន Enrico Letta ត្រូវតែពិនិត្យមើលជាមុនសិនថា តើលោកនៅតែមានសម្លេងគំាទ្រច្រើនដូចមុន ឬមួយក៏អត់។ ដើម្បីអាចដឹងថា គឺមានតែការរៀបចំបោះឆ្នោតផ្តល់សេចក្តីទុកចិត្តដែលគ្រោងធ្វើនៅ ថ្ងៃទី១ តុលាខាងមុខនេះតែប៉ុណ្ណោះ៕ដោយ គួច គន្ធារ៉ា (RFI)