បោះឆ្នោតម៉ាលី៖ជនប្រដាប់អាវុធច្រើននាក់ចូលប្លន់ហិបឆ្នោតមួយ នៅភាគខាងជើង
នៅថ្ងៃអាទិត្យនេះ នៅប្រទេសម៉ាលី ក្នុងពេលមានការរៀបចំបោះឆ្នោតសភានៅជុំទី១នោះ មានជនប្រដាប់អាវុធជាច្រើននាក់ បាននាំគ្នាចូលទៅប្លន់យកហិបឆ្នោតមួយ នៅការិយាល័យបោះឆ្នោតមួយកន្លែង ក្នុងតំបន់ហ្គុនដាំ ជិតតំបន់តុំប៊ុកទូ ភាគពាយព្យប្រទេស។ នេះបើយោងតាមការប្រាប់អោយដឹងពីចៅហ្វាយក្រុងហ្គុនដាំ។ នៅថ្ងៃអាទិត្យនេះ ប្រជាជនម៉ាលីប្រមាណ៦លាន៥សែននាក់ បាននាំគ្នាទៅបោះឆ្នោតសភា ដើម្បីអោយប្រទេសម៉ាលីដែលរងនូវរដ្ឋប្រហារកាលពីខែមិនា ឆ្នាំ២០១២ អាចរៀបចំរដ្ឋធម្មនុញ្ញអោយមានសណ្តាប់ធ្នាប់ឡើងវិញជាស្ថាពរ។
នៅថ្ងៃ អាទិត្យនេះ ការបោះឆ្នោតសភានៅប្រទេសម៉ាលីបានធ្វើឡើងដោយមានការពង្រឹងសន្តិសុខ ខ្ពស់ពីអាជ្ញាធរ ក៏ប៉ុន្តែ ដំណើរការបោះឆ្នោតមិនប្រព្រឹត្តទៅបានល្អ ដូចការចង់ បាននោះទេ។
ម្សិលមិញនេះ លោកស្រី អ៊ូមូ សាល់ សេក Oumou Sall Seck ចៅហ្វាយក្រុងតំបន់ហ្គុនដាំស្ថិតនៅភាគខាងជើងប្រទេសម៉ាលី បានប្រាប់ថា នៅការិយាល័យបោះឆ្នោតមួយកន្លែង ក្នុងតំបន់ហ្គុនដាំនេះមានជនប្រដាប់អាវុធជាច្រើននាក់ បាននាំគ្នាចូលទៅប្លន់យកហិបឆ្នោតមួយដែលប្រើសំរាប់ការបោះឆ្នោតសភា ក្នុងជុំទី១នោះ។ ប៉ុន្តែ ចៅហ្វាយក្រុងរូបនេះមិនបានផ្តល់ព័ត៌មានអ្វីទាក់ទងអត្តសញ្ញាណ ជនប្រដាប់អាវុធទាំងនោះទេ។
ក្រៅពីហេតុការណ៍ប្លន់ហិបឆ្នោតនោះ ចៅហ្វាយក្រុងហ្គុនដាំ ក៏បានប្រាប់ដែរថា នៅតាគូបូ ជាកន្លែងមួយនៅ១៥គីឡូម៉ែត្រពីតំបន់ហ្គុនដាំនេះ ក៏មានការដកហូតបណ្ណបោះឆ្នោតជាច្រើនពីប្រជាជនម៉ាលីផងដែរ។ ដោយឡែក លោក ដាឌីយ៉េ ឌីយ៉ង់ហ្កូ Dadié Diango ប្រធានគណៈកម្មការបោះឆ្នោតជាតិឯករាជ្យមួយនៅតំបន់ហ្គុនដាំ បានប្រាប់ថា មានភាពមិនប្រក្រតីជាច្រើនបានកើតឡើងក្នុងពេលបោះឆ្នោតនៅតំបន់ តុំប៊ុកទូ ដែលស្ថិតនៅខាងជើងប្រទេសក្បែរតំបន់ហ្គុនដាំនេះផងដែរ។ លោកឌីយ៉ង់ហ្កូក៏បានកត់សម្គាល់ផងដែរនូវអវត្តមាន ហិបឆ្នោតជាច្រើនហិប នៅតាមការិយាល័យបោះឆ្នោតផ្សេងៗ នៅតំបន់តុំប៊ុកទូនេះ។
នៅថ្ងៃអាទិត្យម្សិលមិញនេះ ប្រជាជនម៉ាលីប្រមាណ៦លាន៥សែននាក់ បាននាំគ្នាទៅបោះឆ្នោតសភា ដើម្បីអាចអោយម៉ាលីរៀបចំរដ្ឋធម្មនុញ្ញអោយមានសណ្តាប់ធ្នាប់ ជាស្ថាពរឡើងវិញ បន្ទាប់ពីប្រទេសនេះបានរងគ្រោះដោយរដ្ឋប្រហារ ក្នុងខែមិនា ឆ្នាំ២០១២ កន្លងទៅ។ រដ្ឋប្រហារកាលណោះបានធ្វើអោយភាគខាងជើងប្រទេសម៉ាលី ធ្លាក់ក្នុងកណ្តាប់ដៃក្រុមអ៊ីស្លាមដែលជាប់ពាក់ព័ន្ធនឹង ក្រុមអាល់កៃដា។
ចាប់ពីខែមករាដើមឆ្នាំមក សហគមន៍អន្តរជាតិក្រោមការផ្តួចផ្តើមរបស់រដ្ឋាភិបាលបារាំង បានធ្វើប្រតិបត្តិការកំចាត់ក្រុមឧទ្ទាមទាំងនេះ នៅម៉ាលី។ ហើយចាប់ពីចុងខែកញ្ញាមក ការវាយប្រហារ និងអំពើភេរវកម្មជាច្រើន បានសម្លាប់ទាហានម៉ាលី ទាហានឆាដ និងជនស៊ីវិល ប្រមាណជាង១០នាក់៕ដោយ ព្រំ សឿន សូលីណា (RFI)