មនុស្ស ២៩នាក់ ដែលចាប់ខ្លួននៅថ្ងៃប៉ះទង្គិចគ្នារវាងសមត្ថកិច្ច និងកម្មកររោងចក្រSLត្រូវបានដោះលែង
ភ្នំពេញ៖ មនុស្ស ៣២នាក់ ដែលត្រូវសមត្ថកិច្ចឃាត់ខ្លួន ទាក់ទងនឹងអំពើហឹង្សារវាងកម្មកររោងចក្រ SL នឹងកម្លាំងសមត្ថកិច្ច កាលពី ថ្ងៃទី១២ ខែវិច្ចការ ក្នុងនោះមានមនុស្ស២៩ នាក់ដែលជាប់សង្ស័យក្នុងការប្រព្រឹត្តអំពើហឹង្សា ត្រូវបានដោះលែងវិញកាលពីល្ងាចថ្ងៃទី ១៣ ខែវិច្ចការ។
ស្នងការនគរបាលរាជធានីភ្នំពេញ លោក ជួន សុវណ្ណ បានថ្លែងប្រាប់អ្នកសារព័ត៌មានថា ជាមួយនឹងការដោះលែងនោះនៅមានជនសង្ស័យពីររូបទៀត ដែលមិនត្រូវបានដោះលែង ។ លោក បានបញ្ជាក់ថា មូលហេតុ ដែលមិនអាចដោះលែងបាននោះគឺ ដោយសារតែ សមត្ថកិច្ចបានរក ឃើញថា ជនសង្ស័យទាំងពីររូបនោះ បានជាប់ទាក់ទងទៅនឹងការបំផ្លិចបំផ្លាញទ្រព្យសម្បតិ្តសាធារណៈ និងការបង្កអំពើរហឹង្សាទៅលើ សមត្ថកិច្ច។
លោក ជួន សុវណ្ណ បានបន្តថា ជនសង្ស័យទាំងពីររូបនោះត្រូវបានបញ្ជូនទៅនាក់តុលាការសាលារាជធានីភ្នំពេញ ហើយនៅល្ងាចថ្ងៃទី១៣ ខែវិច្ចការ នេះ។
ទាក់ទិននឹងបញ្ហានេះ មន្ទីសើបអង្គេតសមាគមសិទ្ធិមនុស្សអាដហុក លោក ចាន់ សុវេត បានលើកឡើងថា ការបង្កឲ្យមានមនុស្សស្លាប់ និងរបួសជាច្រើននាក់នោះ សម្ថកិច្ចក៏ត្រូវទទួលខុសត្រូវផងដែរ ដោយរដ្ឋាភិបាលគួរត្រួតពិនិត្យទៅលើកម្លាំងប្រដាប់អាវុធ និងសមត្ថកិច្ចរបស់ខ្លួន ចំពោះទង្វើរបស់ពួកគេទៅលើពលរដ្ឋ និងកម្មករ ៕ Cambodia News
