រថយន្តបុកម៉ូតូ របួសធ្ងន់ម្នាក់ រថយន្តគាបជាប់ម៉ូតូ
ភ្នំពេញ៖ កាលពីវេលាម៉ោង ២២និង១៥នាទីយប់ ថ្ងៃទី២១ ខែកុម្ភៈ ម៉ូតូមួយគ្រឿង និងរថយន្តមួយគ្រឿង បើកបុកគ្នាពេញទំហឹង នៅចំណុចមុខវត្តសន្សំកុសល តាមបណ្ដោយផ្លូវ២៧១ ក្នុងសង្កាត់ផ្សារដើមថ្កូវ ខណ្ឌចំការមន បណ្តាលឲ្យបុរសម្នាក់រងរបួសធ្ងន់ធ្ងរ ចំណែក ម៉ូតូ និងរថយន្តរងការខូចខាតយ៉ាងដំណំ ។
មុនពេលកើតហេតុ រថយន្តកូរ៉ូឡា ពណ៌ស្លែ ពាក់ស្លាកលេខភ្នំពេញ 2E-7387 បើកបរក្នុងទិសដៅពីត្បូងទៅជើង តាមផ្លូវ២៧១ ខណៈមកដល់ចំណុចមកវត្តសន្សំកុសល រថយន្តបានទាញចង្កូតបត់ចូលតាមខ្លោងទ្វារវត្ត ខណៈនោះក៏បានបុកម៉ូតូវីវ៉ាមួយគ្រឿង ពណ៌ខ្មៅ ជិះដោយបុរសម្នាក់ពេញទំហឹង បណ្ដាលឲ្យម៉ូតូគាបជាប់និងក្បាលរថយន្ត និងម្ចាស់ម៉ូតូត្រូវរងរបួសធ្ងន់ធ្ងរ។
ក្រោយពីកើតហេតុ រថយន្តបង្កហេតុនិងម៉ូតូរបស់ជនរងគ្រោះ ត្រូវសមត្ថកិច្ចអូសយកទៅរក្សាទុក នៅអធិការដ្ឋាននគរបាលខណ្ឌចំការមន ចំណែកឯអ្នករងរបួស ត្រូវបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរសូវៀត៕ ហេង នាង
