នាយករដ្ឋមន្ត្រីអ៊ីស្រាអែលព្រមានពីកិច្ចព្រមព្រៀងអន្តរជាតិស្ដីពីកម្មវិធីអាវុធនុយក្លេអ៊ែររបស់ប្រទេសអ៊ីរ៉ង់
លោក Benjamin Netanyahu នាយករដ្ឋមន្ត្រីអ៊ីស្រាអែលមានប្រសាសន៍ថា សំណើឲ្យមានកិច្ចព្រមព្រៀងអន្តរជាតិមួយស្ដីពីកម្មវិធីអាវុធ នុយក្លេអ៊ែររបស់ប្រទេសអ៊ីរ៉ង់នឹងនៅតែអនុញ្ញាតឲ្យទីក្រុងតេហេរ៉ង់ ឋិតនៅក្នុងទិសដៅឆ្ពោះទៅរកការផលិតអាវុធនុយក្លេអ៊ែរបានដដែល។
សហគមន៍អន្តរជាតិបានចាប់ផ្ដើមផ្តល់ឱកាសឲ្យប្រទេសអ៊ីរ៉ង់ ក្នុងការសម្រាលនូវទណ្ឌកម្មមួយចំនួន ប្រសិនបើប្រទេសនេះបង្កកនូវកម្មវិធីនុយក្លេអ៊ែររបស់ខ្លួន នៅខណៈពេលគេកំពុងតែរៀបចំបង្ហើយកិច្ចព្រមព្រៀងមួយ។
ប្រទេស អ៊ីរ៉ង់មានសន្និធិសារធាតុអ៊ុយរ៉ានីញ៉ូមដែលបានចម្រាញ់យ៉ាងច្រើន ដែលតិចជាងកម្រិតនៃការធ្វើអាវុធបន្តិចប៉ុណ្ណោះ។
លោក Benjamin Netanyahu នាយករដ្ឋមន្ត្រីអ៊ីស្រាអែលមានប្រសាសន៍ថា សហគមន៍អន្តរជាតិគ្រាន់តែចាប់ផ្ដើមសុំឲ្យប្រទេសអ៊ីរ៉ង់លះបង់ចោល នូវការស្ដុតទុកសារធាតុអ៊ុយរ៉ានីញ៉ូមកម្រិតខ្ពស់តែប៉ុណ្ណោះ។
ទោះបីជាយ៉ាងនេះក្ដី ប្រទេសអ៊ីរ៉ង់អាចរក្សាទុកនូវម៉ាស៊ីនសម្រាប់ចម្រាញ់សារធាតុអ៊ុយរ៉ានីញ៉ូមបាន។
ប្រទេសអ៊ីរ៉ង់អះអាងថា ប្រទេសខ្លួនគ្រាន់តែចង់មានកម្មវិធីនុយក្លេអ៊ែរសន្ដិភាពមួយប៉ុណ្ណោះ។
ទោះជាយ៉ាងនេះ ក្ដី លោក Netanyahu បានធ្វើការព្រមាននៅក្នុងកម្មវិធីទូរទស្សន៍អាហារពេលព្រឹករបស់ អាម៉េរិកថា កិច្ចព្រមព្រៀងនោះគឺនឹងអាចអនុញ្ញាតឲ្យប្រទេសអ៊ីរ៉ង់ក្លាយទៅជា ប្រទេសមានអំណាចនុយក្លេអ៊ែរមួយដែលមានកម្រិតកំណត់ ដែលនៅតែបន្តិចទៀតគឺអាចផលិតគ្រាប់បែកនុយក្លេអ៊ែរបានហើយ៕ (Radio Australia)
