លោក នួន ជា ប្រាប់តុលាការថា ខ្លួនមិនមានទោសអ្វីដូចការចោទប្រកាន់
ភ្នំពេញ៖ កាលពីថ្ងៃទី៣១ ខែតុលា ឆ្នាំ២០១៣ ជនជាប់ចោទ លោក នួន ជា បានប្រាប់អង្គសវនការថា លោកមិនមានទោសអ្វី ដូចការចោទប្រកាន់ទេ ហើយសហព្រះរាជអាជ្ញា មិនមានភ័ស្តុតាងគ្រប់គ្រាន់ ដើម្បីដាក់បន្ទុកលើរូបលោក។
អតីតអនុលេខាបក្សកុម្មុយនីស្ដកម្ពុជា លោក នួន ជា មានពេលវេលាចំនួន១ម៉ោង និង៣០នាទី សម្រាប់ការថ្លែងសេចក្តីសន្និដ្ឋានបញ្ចប់ ក្នុងសំណុំរឿង០០២/០១។ លោក នួន ជា ថ្លែងបែបនេះ បន្ទាប់ពីសហព្រះរាជអាជ្ញា ចង់ឲ្យតុលាការ ដាក់ទោសរូបលោក ឲ្យជាប់ពន្ធនាគារមួយជីវិត។
លោកបន្តថា ចំណុចសង្ស័យជាច្រើនទាក់ទងនឹងភ័ស្តុតាង គឹមិនទាន់បានលាតត្រដាងឲ្យបានច្បាស់លាស់នៅចំពោះមុខតុលាការ ដូចជាឯកសារដើម និងសក្ខីកម្មនៃសាក្សីសំខាន់ៗ ដែលជួយដល់រូបលោក។
លោក នួន ជា ថ្លែងទៀតថា លោក មិនមានអំណាចអ្វី និងមិនជាប់ពាក់ព័ន្ធទៅនឹងការប្រព្រឹត្តបទល្មើស ដែលកើតមានឡើងនៅក្នុងរបបកម្ពុជាប្រជាធិបតេយ្យនោះទេ។ លោកបន្តថា លោក មានតួនាទីជាអនុលេខាបក្សកុម្មុយនីស្តកម្ពុជា ដែលដើរតួជាអ្នកឃោសនា អប់រំអំពីគោលនយោបាយបក្សនៅក្នុងជួរសមាជិកបក្ស។
លោក នួន ជា ជាអតីតប្រធានរដ្ឋសភានៃរបបកម្ពុជាប្រជាធិបតេយ្យ និងអនុលេខាបក្សកុម្មុយនីស្តកម្ពុជា។ ចំណែក លោក ខៀវ សំផន ជាអតីតប្រមុខរដ្ឋនៃរបបកម្ពុជាប្រជាធិបតេយ្យ។ ជនជាប់ចោទទាំង ២រូប ត្រូវចោទប្រកាន់ពីបទឧក្រិដ្ឋកម្មប្រឆាំងនឹងមនុស្សជាតិ ការរំលោភបំពានធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ១៩៤៩ និងឧក្រិដ្ឋកម្មប្រល័យពូជសាសន៍លើជនជាតិចាម និងវៀតណាម៕ Cambodia News
