តាត ម៉ារីណា តាមលងភរិយាលោក ស្វាយ ស៊ីថា អនុរដ្ឋលេខាធិការទីស្ដីការគណៈរដ្ឋមន្ត្រី
តាត ម៉ារីណា អតីតតារាចម្រៀងដែលរងទារុណកម្មដោយការជះទឹកអាស៊ីតកាលពី១៥ ឆ្នាំ បានលេចមុខជាលើកដំបូង ដើម្បីស្វែងរកយុត្តិធម៌សម្រាប់នាង ក្រោយពីភរិយាលោក ស្វាយ ស៊ីថា អនុរដ្ឋលេខាធិការទីស្ដីការគណៈរដ្ឋមន្ត្រី ឈ្មោះ ឃួន សុផល ព្រមទាំងក្មួយឈ្មោះ វណ្ណឌី និងបក្ខពួក ៤នាក់ទៀត បាននាំគ្នាមកធ្វើទារុណកម្មដោយចាក់ស្រោចទឹកអាស៊ីតមកលើក្បាលនិងខ្លួនប្រាណរបស់នាងកាលពី១៥ឆ្នាំមុន។កាលពីពេលនោះ នាងជាអនិតិជននៅឡើយ គឺអាយុប្រមាណ ១៧ ឆ្នាំ ប៉ុណ្ណោះ។ បច្ចុប្បន្ន តាត ម៉ារីណា រស់នៅសហរដ្ឋអាមេរិក។
ដោយមិនធ្វើការបរិយាយច្រើន សារព័ត៌មានឃែមបូឌា ញូស៌ សូមផ្សាយបទសម្ភាសន៍ទាំងស្រុងរវាងនាង តាត ម៉ារីណា និងវិទ្យុអាស៊ីសេរីកន្លងមកនេះ ស្តីពីរឿងរ៉ាវទំនាក់ទំនងរបស់នាងជាមួយលោក ស្វាយ ស៊ីថា ដែលជាដើមហេតុធ្វើឲ្យនាងទទួលរងទារុណកម្មមួយជីវិតបែប នេះ។ ខ្លឹមសារនៃបទសម្ភាសន៍មានដូចតទៅ៖
នេះ គឺជាលើកទីមួយហើយដែលនាង តាត ម៉ារីណា បានលាតត្រដាងពីប្រវត្តិស្នេហារបស់នាងជាមួយ លោក ស្វាយ ស៊ីថា អនុរដ្ឋលេខាធិការទីស្ដីការគណៈរដ្ឋមន្ត្រី បន្ទាប់ពីនាងត្រូវបានប្រពន្ធរបស់ លោក ស្វាយ ស៊ីថា និងបក្ខពួក ៥នាក់ទៀត ព្រួតគ្នាធ្វើបាប និងចាក់ទឹកអាស៊ីតបំផ្លាញមុខមាត់រាងកាយរបស់នាង។ ទោះបីជាមាត់របស់នាងរលេះរលួយយ៉ាងណាក៏ដោយ ក៏នាងខំនិយាយរៀបរាប់រំលឹករឿងរ៉ាវទាំងត្រដរ៖ «ខ្ញុំអាយុ ១៦ ជិត ១៧ឆ្នាំ»។
នាងនិយាយថា ពេលនេះនាងអាយុ ១៦ជិតចូល ១៧ឆ្នាំហើយ។ នាងថា លោក ស្វាយ ស៊ីថា បានមានទំនាក់ទំនងជាមួយនាងតាំងពីនាងនៅជាកុមារីអាយុ ១៤ឆ្នាំ គឺតាំងពីឆ្នាំ១៩៩៨ មកម៉េ្លះ។ ម៉ារីណា បាននិយាយដែរថា តាំងពីពេលគេវាយធ្វើបាបនាងមក នាងភ្លេចភ្លាំងច្រើនណាស់ នាងមិនចាំសាច់រឿងអស់ទេ។ ប៉ុន្តែនាងចាំបានថា លោក ស្វាយ ស៊ីថា បានជួលផ្ទះមួយអោយនាងនៅ ហើយថាគាត់តែងមកជួបរួមស្នេហាជាមួយនាងជារៀងរាល់ថ្ងៃ៖ «ឥឡូវខួរក្បាលខ្ញុំអត់សូវល្អទេ។ គាត់ជួលផ្ទះអោយខ្ញុំនៅ គាត់មករាល់ថ្ងៃ»។
បីខែក្រោយដែលនាងចុះពីផ្ទះ ហើយទៅនៅផ្ទះជួលជាមួយ លោក ស្វាយ ស៊ីថា នោះ ទើបនាងដឹងតាមអ្នកដទៃថា លោក ស្វាយ ស៊ីថា មានប្រពន្ធរួចទៅហើយ។ នាងថា នាងបានព្យាយាមនិយាយជាមួយ លោក ស្វាយ ស៊ីថា ដើម្បីទៅផ្ទះវិញដែរ ក៏ប៉ុន្តែ លោក ស្វាយ ស៊ីថា មិនព្រម៖ «គាត់អត់ព្រម»។
ម្តាយរបស់នាង តាត ម៉ារីណា ដែលនៅប្រទេសកម្ពុជា បានប្រាប់យើងតាមទូរស័ព្ទថា គាត់បានដឹងបានឮរឿងសុំលែងលះនេះដែរ៖ «កូន ខ្ញុំសុំលែង ហើយគាត់មិនព្រមលែងទេ។ គាត់ស្តីគាត់ថា សុទ្ធតែកូនខ្ញុំហ្នឹងមានថ្មីមានសហាយអីអ៊ីចឹងណាស់។ ហើយគាត់មិនព្រមលែងទេ គាត់ថា បើសិនជាកូនខ្ញុំលែង គាត់តាមធ្វើបាប គាត់តាមព្យាបាទរហូតដល់ជីវិតគាត់ស្លាប់ ទើបគាត់ព្រម។ ហើយបើកូនខ្ញុំទៅនៅឯណា គាត់ជួលគេទៅជេរទៅបញ្ចោរនៅកន្លែងហ្នឹង។ មិនអោយកូនខ្ញុំរស់នៅបានស្រួលទេ។ ហើយបើកូនខ្ញុំចោលគាត់ គាត់ឃើញនៅកន្លែងណា គាត់បើកឡានបុកបាក់ដៃបាក់ជើងជរាពិការ មិនអោយកូនខ្ញុំមានអ្នកណាស្រឡាញ់ទៀត។ ខ្ញុំឮផ្ទាល់នឹងត្រចៀក។ ពេលដែលគេខឹងហ្នឹង កូនខ្ញុំ ពីរឿងថាលែងថាអី គេជេរគេដៀលកូនខ្ញុំនៅនឹងមុខខ្ញុំ ហ្នឹងខ្ញុំឮដែរអារឿងអ៊ីចឹងៗ»។
នាង ម៉ារីណា និយាយថា នាងស្រឡាញ់ លោក ស្វាយ ស៊ីថា តែប៉ុន្មានរយៈពេលប៉ុន្មានខែដំបូងទេ តែការដែលនាងអាចនៅជាមួយលោកបានប្រមាណពីរឆ្នាំនេះ ក៏ព្រោះតែនាងខ្លាចមិនហ៊ានចុះទៅរកឪពុកម្តាយវិញ៖ «ខ្ញុំដំបូងស្រឡាញ់។ តែក្រោយមកខ្លាច»។
តាត ម៉ារីណា មានមូលហេតុដែលធ្វើអោយនាងខ្លាច។ មានពេលខ្លះ ពេលដែលនាងសុំត្រឡប់ទៅផ្ទះវិញ នាងថា លោក ស្វាយ ស៊ីថា ហ៊ានរហូតទៅដកកាំភ្លើងបាញ់ចន្លោះជើងនាងទៀតផង។ ខ្ញុំបានសួរនាងថា លោក ស្វាយ ស៊ីថា គំរាមបាញ់នាងប៉ុន្មានដង។ នាងលើកចង្អុលដៃមួយបង្ហាញ។
មិនមែនតែស្រីតូច ម៉ារីណា ទេដែលខ្លាច សូម្បីតែម្តាយនាង ម៉ារីណា ដែលជាមនុស្សពេញវ័យក៏ខ្លាចដែរ។ នៅពេលដែលដឹងរឿង លោក ស្វាយ ស៊ីថា បាញ់គំរាមកូនស្រីមិនទាន់ពេញវ័យរបស់គាត់ គាត់បានត្រឹមតែប្រាប់អោយកូនស៊ូទ្រាំតែប៉ុណ្ណោះ៖ «ខ្ញុំក៏ អង្វរកូនខ្ញុំដែរ ថាណ្ហើយកូនអើយទ្រាំតាមយថាកម្មទៅ។ បើកាលណាគេអស់ចិត្ត អាហ្នឹងបានកូនបានសុខ។ បើកាលណាគេមិនទាន់អស់ចិត្តទេ កូនឯងលែងគេ ក៏កូនឯងមិនបានសេចក្តីសុខដែរ។ ទ្រាំតាមយថាកម្មទៅ»។
ម៉ារីណា ក៏សុខចិត្តរស់នៅតាមយថាកម្មជាមួយ លោក ស្វាយ ស៊ីថា រហូតដល់ថ្ងៃទី៥ ខែធ្នូ ឆ្នាំ១៩៩៩ ទើបប្រពន្ធ លោក ស្វាយ ស៊ីថា ឈ្មោះ ឃួន សុផល ជាមួយនិងក្មួយឈ្មោះ វណ្ណឌី និងបក្ខពួក ៤នាក់ទៀត នាំគ្នាមកធ្វើទារុណកម្មលើនាង៖ «ដំបូងគាត់អ្នកចាប់ទាញសក់ ខ្ញុំ អូសពីលើកៅអីធ្លាក់មកនឹងដី។ ហើយបន្ទាប់មក គាត់ធាក់ខ្ញុំ។ ប្រុសៗហក់មកវ៉ៃខ្ញុំទៀត។ វាចាប់ខ្លួនខ្ញុំអុកនឹងជង្គង់វាហ្នឹង ទ្រូងខ្ញុំហ្នឹង…ច្រើន…ច្រើន..ជង្គង់ណាស់។ ខ្ញុំចុកខ្លាំងពេក ឈាមចេញតាមច្រមុះមក… ហើយបែកមាត់ទៀតរួចក៏សន្លប់…ហើយទៅ គេស្រោចអាស៊ីតលើខ្ញុំ។ ខ្ញុំអត់ដឹងខ្លួនទេ នៅពេលក្តៅពេកដូចគេកន្ទ្រាក់សរសៃខ្ញុំ អោយភ្ញាក់ឡើងវិញ។ ខ្ញុំក៏ស្ទុះងើប ស្ទុះងើបទៅ ដំបូងស្មានថាគេចាក់ទឹកក្តៅ។ ហើយពេលដែលត្រូវទឹកអាស៊ីតហ្នឹងណាស់ មាត់ខ្ញុំជូរខ្លាំងមែនទែន…»។
គ្រួសារនាង ម៉ារីណា មិនដាក់ពាក្យប្ដឹងប្រពន្ធ លោក ស្វាយ ស៊ីថា និងជនដៃដល់ដទៃទៀតទេ ព្រោះពួកគាត់គិតថា ខ្លួនទីទាល់ក្រមិនអាចតតាំងនឹងអ្នកមានអំណាចបានទេ៖ «ខ្ញុំជា ប្រជារាស្ត្រដែលក្រីក្រ ហើយដូចថា យើងអ្នកតូចតាចអ៊ីចឹងណាស់។ យើងមិនហ៊ានតតាំងហ្នឹងគេទេ។ ខ្ញុំជាម្តាយមានការឈឺចាប់ណាស់ ប៉ុន្តែមិនដឹងធ្វើម្ដេចទេ បើយើងលុយកាក់ក៏គ្មាន ស្អីក៏គ្មានអ៊ីចឹង មិនដឹងធ្វើម៉េចដែរ»។
ម្តាយរបស់នាង ម៉ារីណា ក៏បាននិយាយថា គ្រួសារគាត់មានការព្រមព្រៀងគ្នាមួយជាមួយ លោក ស្វាយ ស៊ីថា៖ «កាល ថ្ងៃដែលហៀបទៅអាមេរិកហ្នឹងក៏ដោយ កូនខ្ញុំនិយាយសុំគាត់ថា តែ ១ម៉ឺន ៥ពាន់ទេថាអោយដាច់។ ១ម៉ឺន ៥ពាន់ គឺយកដាច់មិនបាច់អោយគាត់មើលអីទេ។ គាត់ក៏សន្យាថាគាត់ព្រម។ ក៏ប៉ុន្តែ គាត់អោយពួកខ្ញុំជាម្តាយជាបងហ្នឹងផ្ដិតមេដៃ សាមីខ្លួនហ្នឹងផ្ដិតមេដៃមិនអោយប្ដឹងប្រពន្ធគាត់តទៅទៀត។ ក៏ប៉ុន្តែដល់ទីបញ្ចប់ មុននឹងឡើងយន្តហោះពីរថ្ងៃ គាត់ថា គាត់មានតែបីពាន់ដុល្លា។ សូមលោកជ្រាបមើលពី ១ម៉ឺន ៥ពាន់ មកនៅត្រឹមបីពាន់ ហើយជីវិតកូនខ្ញុំ រូបកាយសម្ផស្សកូនខ្ញុំដែលនៅអាក្រក់ ហើយដែលវ័យក្មេងរបស់គ្នានោះ។ ហើយបីពាន់ដុល្លារហ្នឹង អាចយកទៅបិទបាំងបានដែរទេ?»។
មកទល់នឹងពេលនេះ នាង ម៉ារីណា និងគ្រួសារ មិនទាន់បានយុត្តិធម៌តាមផ្លូវច្បាប់ ឬទទួលនូវសំណងអ្វីដែល លោក ស្វាយ ស៊ីថា បានសន្យានៅឡើយទេ។ ចំណែកនាង ម៉ារីណា ថ្វីត្បិតតែពេលនេះនាងបាននៅឆ្ងាយពីក្រុមជនដែលធ្វើបាប និងបានទទួលការព្យាបាល និងថែរក្សាពីសំណាក់គ្រូពេទ្យជំនាញនៅសហរដ្ឋអាមេរិក ក្តី នាងថានាងនៅតែមានអារម្មណ៍ភ័យរន្ធត់ ស្រមៃឃើញឆុតឆាកដែលគេធ្វើទារុណកម្មមកលើនាង ជាពិសេសនៅពេលនាងគេង៖ «គេងអត់សូវលក់ទេ ហើយបើគេងលក់យល់សប្ដិឃើញរឿង…គឺឃើញ…ឃើញការដែលថ្ងៃកើតហេតុ ហ្នឹង ហើយវាភ្ញាក់…ភ្ញាក់ស្រែកខ្លាំង…ហើយភ្ញាក់ឡើង…ពេលដែលស្រែកហ្នឹង ភ្ញាក់ឡើងញ័រសាច់ភ័យចង់តែយំ ចង់រាល់យប់…»៕
