ស្ត្រីម្នាក់បើករថយន្តចូលទៅចតក្នុងរោងបុណ្យបង្កការភ្ញាក់ផ្អើលទាំងយប់
ភ្នំពេញ៖ កាលពីវេលាម៉ោង ១០ និង ៤០នាទីយប់ថ្ងៃទី២៩ ខែតុលា ស្ត្រីម្នាក់ បានបើករថយន្ត Prius របស់ ខ្លួនមួយគ្រឿងក្នុងល្បឿនលឿន ចូលចតក្នុងរោងបុណ្យនៅចំណុចផ្ទះលេខ១១៤Eo តាមបណ្តោយផ្លូវលេខ១៣៨ស្ថិតក្នុងសង្កាត់ផ្សារដេប៉ូទី២ ខណ្ឌទួលគោក បង្កការភ្ញាក់ផ្អើលដល់ប្រជាពលរដ្ឋយ៉ាង ខ្លាំង រហូតមានការប្តឹងផ្តល់អោយមានការអន្តរាគមន៍ពីសមត្ថកិច្ចប៉ូលិស មូលដ្ឋានផងដែរ។
ប្រភពព័ត៌មានបានឲ្យដឹងថា មុនពេលកើតហេតុគេបានឃើញស្ត្រីម្នាក់ខាងលើបានបើករថយន្តមួយគ្រឿងម៉ាក Prius ពណ៌ស ពាក់ស្លាកលេខ ភ្នំពេញ 2Q-0529 តាម បណ្តោយផ្លូវ លេខ១៣៨ ក្នុងទិសដៅពីជើងទៅត្បូង។
លុះបើកបរមកដល់ចំណុចកើតហេតុដែលជាកន្លែងដែលអ្នកក្បែរខាងធ្វើរោង និងកំពុងតែធ្វើបុណ្យនោះស្ត្រីម្នាក់នេះក៏បានបើករថយន្តមកចតក្នុង រោងបុណ្យនោះ ហើយបានដើរចូលក្នុងផ្ទះរបស់ខ្លួនបាត់ ខណៈដែលភ្ញៀវកំពុងហូបបាយពេញរោងបុណ្យនោះទើបបង្កឲ្យភ្ញាក់ផ្អើលពេញ រោងបុណ្យតែម្តង។
ភ្លាមៗដោយម្ចាស់រោងបុណ្យខឹងខ្លាំងពេក បានទំនាក់ទំនងទៅសមត្ថកិច្ចមូលដ្ឋានដើម្បីចុះមកអន្តរាគមន៍ហៅម្ចាស់ រថយន្តមកបើករថយន្តចេញ។ ក្រោយពេល កើតហេតុសមត្ថកិច្ចបានចុះមកអន្តរាគមន៍ដល់កន្លែងកើតហេតុ ទើបបុរសត្រូវជាប្ដីរបស់ស្ត្រីខាងលើបានចេញមកសុំទោសម្ចាស់ ដើមបុណ្យ និងបើករថយន្តចេញពីកន្លែងកើតហេតុ ម្ចាស់ដើមបុណ្យមិនរករឿងអ្វីវែងឆ្ងាយបន្តទៅទៀត ម្យ៉ាងក្នុងពេលបំពេញកុសលផង៕ Cambodia News