ឥស្សរជនសំខាន់ៗចូលគោរពព្រះវិញ្ញាណក្ខន្ធសម្តេច សីហនុ
ភ្នំពេញ៖ នៅព្រឹកថ្ងៃទី១៥ ខែតុលានេះ មន្ត្រីជាន់ខ្ពស់រាជរដ្ឋាភិបាល រដ្ឋសភា និងព្រឹទ្ធសភា បានចូលគោរពព្រះវិញ្ញាណក្ខន្ធព្រះករុណា ព្រះបាទ សម្តេចព្រះនរោត្តម សីហនុ នៅទីកន្លែងតម្កល់ព្រះបរមរូប ដើម្បីរំលឹកខួបគម្រប់មួយឆ្នាំនៃការចូលទិវង្គតរបស់ព្រះអង្គ។
ឥស្សរជនសំខាន់ៗបានដឹកនាំមន្ត្រីតាមក្រសួង ស្ថាប័នរបស់ខ្លួន ចូលគោរពព្រះវិញ្ញាណក្ខន្ធ មានដូចជាព្រឹទ្ធសភា ដឹកនាំដោយលោក សាយ ឈុំ រដ្ឋសភាដឹកនាំដោយលោក ហេង សំរិន រាជរដ្ឋាភិបាលដឹកនាំដោយ លោកនាយករដ្ឋមន្ត្រី ហ៊ុន សែន ចំណែកមន្ត្រីតាមក្រសួងនានា ក៏ដឹកនាំមន្ត្រីរបស់ខ្លួនចូលគោរពព្រះវិញ្ញាណក្ខន្ធជា បន្តបន្ទាប់ដែរ។
ក្នុងក្រសួងស្ថាប័ននិមួយៗ មានមន្ត្រីរបស់ខ្លួន ចូលគោរពព្រះវិញ្ញាណក្ខន្ធពី ២០ទៅ៣០នាក់។ មន្ត្រីទាំងនោះមានស្លៀកពាក់ជាឯកសណ្ឋាន និងមានបាច់ផ្កាដាក់ថ្វាយ ហើយចូលជាក្រុមៗ តាមការរៀបចំរបស់មន្ត្រីពិធីការ៕ Cambodia News
