កងរក្សាសន្តិភាពអង្គការសហប្រជាជាតិ៣នាក់ ស្លាប់នៅក្នុងការវាយប្រហារនៅទីក្រុងដាហ្វួរ
ក្រុមប្រដាប់អាវុធបានវាយប្រហារលើ ក្បួនដឹកទឹករបស់កងរក្សាសន្តិភាពអង្គការសហ ប្រជាជាតិ នៅតំបន់ដាហ្វួរ ប្រទេសស៊ូដង់ បណ្ដាលឲ្យកងរក្សាសន្តិភាពជនជាតិសេណេ ហ្កាល់ចំនួន៣នាក់ ស្លាប់បាត់បង់ជីវិត។ ប្រមុខអង្គការសហប្រជាជាតិ លោកបានគីមូន បានថ្កោលទោសការវាយប្រហារនេះ និងបានទាមទារឲ្យរដ្ឋាភិបាលស៊ូដង់ ស្វែងរកចាប់ខ្លួនក្រុមជនប្រដាប់អាវុធទាំងនោះ យកមកដាក់ទោសទណ្ឌតាមច្បាប់។
បើតាមការឲ្យដឹងពីអង្គភាពប្រតិបត្តិការរួមរវាងសហភាព អាហ្វ្រិក និងអង្គការសហប្រជា ជាតិប្រចាំតំបន់ដាហ្វួរ UNAMID កងរក្សាសន្តិភាព ត្រូវបានវាយប្រហារដោយក្រុមជនប្រដាប់អាវុធមួយក្រុម ខណៈដែលពួកគេកំពុងតែដឹកទឹកពីទីក្រុង El Geneina ទៅទីស្នាក់ការកណ្ដាលតំបន់នៃអង្គការសហប្រជាជាតិ នៅភាគខាងលិចតំបន់ដាហ្វួរ កាលពីព្រឹកថ្ងៃអាទិត្យ ទី១៣តុលា។ ជាការវាយប្រហារ ដែលបណ្ដាលឲ្យកងរក្សាសន្តិភាពជនជាតិសេណេហ្កាល់ចំនួន៣នាក់ ស្លាប់ បាត់បង់ជីវិត។
អគ្គលេខាធិការអង្គការសហប្រជាជាតិ លោក បានគីមូន បានបញ្ជាក់នៅក្នុងសេចក្ដីថ្លែងការណ៍ថា កងរក្សាសន្តិភាព UNAMID ត្រូវបានវាយប្រហារនិងសម្លាប់ជាញឹកញាប់ នៅក្នុងភារកិច្ចរបស់ខ្លួន ក្នុងការស្វែងរកសន្តិភាពដល់តំបន់ដាហ្វួរ។ ការវាយប្រហារលើកនេះ ត្រូវបានលោកប្រមុខអង្គការសហប្រជាជាតិថ្កោលទោសថា ជាអំពើដែលមិនអាចទទួលយកបាន និងបានទាមទារឲ្យរដ្ឋាភិបាលស៊ូដង់ ស្វែងរកចាប់ខ្លួនក្រុមជនប្រដាប់ អាវុធទាំងនោះ យកមកដាក់ទោសទណ្ឌតាមច្បាប់។
ប្រតិបត្តិការរួមរវាងសហភាពអាហ្វ្រិក និងអង្គការសហប្រជាជាតិប្រចាំតំបន់ដាហ្វូរ ហៅកាត់ថា UNAMID ត្រូវបានបង្កើតឡើងដោយក្រុមប្រឹក្សាសន្តិសុខអង្គការសហប្រជាជាតិ នៅ ឆ្នាំ ២០០៧ មានតួនាទីការពារប្រជាពលរដ្ឋ និងជួយរក្សាសន្តិសុខនៅតំបន់ដាហ្វួរ។ តំបន់ដាហ្វួរ ដែលជាសមរភូមិក្ដៅ រវាងក្រុមប្រឆាំង និងកងទ័ពរដ្ឋាភិបាលតាំងពីឆ្នាំ២០០៣ បណ្ដាលឲ្យមនុស្សជាង៣០ម៉ឺននាក់ស្លាប់ និងជាង២លាននាក់ផ្សេងទៀត ត្រូវភៀសខ្លួនចេញពីទីនោះ។
កងរក្សាសន្តិភាព UNAMID ត្រូវរងការវាយប្រហារជាច្រើនដងមកហើយ ក្នុងរយៈពេលប៉ុន្មានខែចុងក្រោយនេះ។ ការវាយប្រហារដ៏សាហាវព្រៃផ្សៃបំផុតមួយ កើតឡើងនៅខែកក្កដាកន្លងទៅ សម្លាប់កងរក្សាសន្តិភាពជនជាតិលីបង់ចំនួន៧នាក់ និង១៧នាក់ផ្សេងទៀតរងរបួស៕ដោយ អ៊ឹម រចនា (RFI)