ក្រុងប៉េកាំងព្យាយាមរកដំណោះស្រាយវិបត្តិជម្លោះនៅសមុទ្រចិន
ក្នុងជំនួបកំពូលប្រចាំឆ្នាំអាស៊ាន នៅប្រទេសព្រុយណេ នៅថ្ងៃពុធនេះ នាយករដ្ឋមន្ត្រីចិន លី ខឺឈាំង បានបង្ហាញគោលជំហររបស់រដ្ឋាភិបាលចិន ក្នុងការស្វែងរកដំណោះស្រាយវិបត្តិជម្លោះនៅសមុទ្រចិន។ អវត្តមានរបស់ប្រធានាធិបតីអាមេរិក អូបាម៉ា នៅអាស៊ី បានធ្វើអោយចិនលេចមុខធ្លោឡើង ក្នុងការទាក់ទាញបណ្តាប្រទេសអាស៊ាន។ អ្នកវិភាគនានាគិតថា ការដែលចិនបង្ហាញគោលជំហរស្វែងរកដំណោះស្រាយជំលោះ នៅសមុទ្រចិននោះ គឺដើម្បីចំណេញពេលវេលាពង្រឹងផ្នែកយោធាខ្លួនតែប៉ុណ្ណោះ។
នៅ ថ្ងៃពុធនេះ ក្នុងជំនួបកំពូលប្រចាំឆ្នាំអាស៊ាន នៅប្រទេសព្រុយណេ នាយករដ្ឋមន្ត្រីចិន លី ខឺឈាំង បានលើកឡើងនៅចំពោះមុខប្រមុខដឹកនាំនៃបណ្តាប្រទេសអាស៊ានថា យើងត្រូវតែធ្វើការរួមគ្នា ដើម្បីអោយសមុទ្រចិនខាងត្បូង ក្លាយជាដែនសមុទ្រប្រកបដោយសន្តិភាព មិត្តភាព និងភាពសហប្រតិបត្តិការរវាងគ្នានិងគ្នា។
តាមរយៈ ការលើកឡើងរបស់លោក លី ខឺឈាំង រដ្ឋាភិបាលចិនបានបង្ហាញនូវគោលជំហរខ្លួន ក្នុងការស្វែងរកដំណោះស្រាយជម្លោះដែនទឹក នៅសមុទ្រចិនខាងត្បូង។ ចិនចង់ធានាអោយមានសេរីភាពនាវា ចរណ៍ក្នុងតំបន់។ កន្លងមក ក្រុងប៉េកាំងតែងដណ្តើមបូរណភាពដែនទឹកនៅស្ទើរគ្រប់ទីកន្លែង នៅសមុទ្រចិនខាងត្បូង ជាមួយប្រទេសអាស៊ានជាច្រើន ពិសេសវៀតណាម និងហ្វីលីពីន។
អស់រយៈ១០ឆ្នាំមកនេះ ដើម្បីបន្ថយភាពតានតឹងដោយសារជម្លោះអស់នេះ បណ្តាប្រទេសអាស៊ានបានជំរុញចិនអោយចុះហត្ថលេខាលើក្រមប្រណិបត្តិមួយ ទាក់ទងនឹងសមុទ្រចិនខាងត្បូងនេះ។ ប៉ុន្តែ រដ្ឋាភិ បាលចិនចង់មានកិច្ចពិភាក្សាបែបទ្វេភាគី ជាមួយប្រទេសនីមួយៗ ច្រើនជាជាង។ ក្រោយមកទៀត ចិនបានប្តូរជំហរទៅវិញ ដោយបើកចំហការចរចាពីក្រមប្រណិបត្តិនេះជាមួយអាស៊ាន ហើយថែមទាំងសំរេចបានក្រុមការងារមួយ ទទួលបន្ទុកផ្នែកពិភាក្សាជាក់ស្តែង លើគំរោងនេះទៀតផង។
នៅថ្ងៃពុធនេះ នាយករដ្ឋមន្ត្រីចិន ក៏បានលើកឡើងដែរថា ត្រៀមធ្វើការងារជាមួយប្រទេសឯទៀត ដើម្បីតាក់តែងក្រមប្រណិបត្តិនៅសមុទ្រចិនខាងត្បូងនេះ។ ប្រធានាធិបតីហ្វីលីពីន បេនីញ៉ូ អាគីណូ បានគូសបញ្ជាក់ថា ការពិភាក្សាលើក្រមប្រណិបត្តិនេះ មានការរីកចំរើនទៅមុខខ្លះៗហើយ។
ទោះយ៉ាងនេះក្តី គេនៅចាំមើលពីជំហររបស់ចិនតទៅទៀត នៅថ្ងៃព្រហស្បត្តិ៍ទី១០តុលានេះ នៅក្នុងកិច្ចប្រជុំកំពូលអាស៊ាន ដែលរាប់ទាំងអាស៊ីខាងកើត បូកនឹងអាមេរិកដែរនោះ ព្រោះថា ថ្ងៃនេះ នឹងមានការលើកឡើងពីបញ្ហាជម្លោះប្រជុំកោះសេនកាគូ នៅសមុទ្រចិនខាងកើត រវាងចិននិងជប៉ុន ផងដែរ៕ដោយ ព្រំ សឿន សូលីណា (RFI)