កម្ពស់ទឹកទន្លេមេគង្គចតុមុខឡើងជិតដល់កម្រិតប្រកាសអាសន្ន
ភ្នំពេញ ៖ ស្ថានភាពទឹកទន្លេមេគង្គចតុមុខរាជធានីភ្នំពេញនៅព្រឹកថ្ងៃទី៣០ កញ្ញា ២០១៣ បានឡើងដល់កម្ពស់១០,២៦ម៉ែត្រ លើកម្រិតដែលត្រូវប្រកាសឲ្យមានការប្រុងប្រយ័ត្ន១០,៥០ម៉ែត្រ ។
ប្រធានមន្ទីរធនធានទឹកនិងឧតុនិយមរាជធានីភ្នំពេញ លោក ម៉ៅ ប៊ុនធឿន បានបញ្ជាក់ឲ្យដឹងទៀតថា នៅថ្ងៃស្អែក(០១តុលា) ទឹកនឹងបន្តឡើងដល់កម្ពស់ ១០,២៨ម៉ែត្រ ប៉ុន្តែនៅថ្ងៃទី០២ តុលា ២០១៣ កម្ពស់ទឹកទន្លេចតុមុខនឹងស្រកមកនៅត្រឹមកម្ពស់១០,២៦ម៉ែត្រវិញ និងនៅថ្ងៃទី០៣តុលា កម្ពស់ទឹកទន្លេមេគង្គចតុមុខនឹងស្រកនៅត្រឹម១០,២៣ម៉ែត្រ តែទឹកនៅស្ថានីយ៏ជលសាស្រ្តខេត្តស្ទឹងត្រែង ទឹកជំនន់នឹងហក់ឡើងជាថ្មី។
លោកប្រធានមន្ទីរធនធានទឹកនិងឧតុនិយមរាជធានីភ្នំពេញបានបន្តថា មកដល់ពេលនេះ ទ្វារទឹក ស្ថានីយ៏ និងប្រព័ន្ឋលូចំនួនកន្លែង៨ ក្នុងចំណោម១១កន្លែង ត្រូវបានបិទនិងបូមទឹកចេញ ។
លោក ម៉ៅ ប៊ុន ធឿន បានព្រមានថារាជធានីភ្នំពេញអាចនឹងលិចលង់ ប្រសិនបើទឹកភ្លៀងធ្លាក់ក្នុងកម្រិតកម្ពស់៥០មិល្លីម៉ែត្រ តែស្ថានភាពបច្ចុប្បន្នមិនទាន់មានអ្វីប្រែប្រួលនៅឡើយទេ ហើយថាព្រែក បឹងបួរ និងស្ថានីយ៏សណ្តជុំវិញរាជធានីភ្នំពេញមកដល់ព្រឹកថ្ងៃទី៣០កញ្ញានេះ ទឹកក៏មិនទាន់ជនលិចនៅឡើយនោះដែរ៕ Cambodia News
