ប្រទេសម៉ិចស៊ិករងការវាយប្រហារដោយព្យុះសង្ឃរាថ្មី
ព្យុះរដូវមូសុងមានឈ្មោះថា “ម៉ានុយអេល” បានវាយប្រហារប្រទេសម៉ិចស៊ិក តាំងពីថ្ងៃសៅរ៍មក ហើយនៅយប់ថ្ងៃពុធម្សិលមិញនេះ ព្យុះម៉ានុយអេលបានប្រែក្លាយទៅជាព្យុះសង្ឃរាបន្តគំរាមម៉ិចស៊ិក ដដែល។ មហន្តរាយព្យុះភ្លៀងនៅប៉ុន្មានថ្ងៃចុងក្រោយនេះ បានសម្លាប់មនុស្សយ៉ាងហោច៨០នាក់ ហើយមានមនុស្សប្រមាណ៥៨នាក់បាត់ខ្លួន នៅក្នុងការស្រុតបាក់ដី។
ចាប់ពីថ្ងៃសៅរ៍ចុងសប្តាហ៍មុនមក ប្រជាជនម៉ិចស៊ិកនៅតែបន្តរងការគំរាមកំហែងដោយព្យុះភ្លៀង។ កាលពីចុងសប្តាហ៍ នៅពេលដែលព្យុះ”ម៉ានុយអេល”ចូលខ្លួនទៅប៉ះនឹងផ្ទៃដីនៅភាគខាងត្បូង ប្រទេស ព្យុះនេះ បានបន្ថយឥទ្ធិពលរបស់ខ្លួន។ ប៉ុន្តែ នៅពេលដែលបោកបក់ឆ្លងកាត់តាមបណ្តោយឆ្នេរមហាសមុទ្រប៉ាស៊ី ហ្វិក ព្យុះ”ម៉ានុយអេល” បានចាប់បញ្ចេញកម្លាំងរបស់ខ្លួនឡើងវិញ ប្រែទៅជាព្យុះសង្ឃរាដែលមានល្បឿនរហូត១១៥គីឡូម៉ែត្រក្នុងមួយម៉ោង។ ព្យុះសង្ឃរាថ្មីនេះ បានបន្តបោកបក់ចូលទៅភាគឥសានប្រទេសម៉ិចស៊ិកថែមទៀត។
នៅថ្ងៃ សៅរ៍ ខាងផ្នែកឈូងសមុទ្រម៉ិចស៊ិកក៏បានរងការគំរាមកំហែងដោយព្យុះសង្ឃរា មួយទៀតដែរ ឈ្មោះថា អ៊ីនហ្គ្រីដ។ ប៉ុន្មានថ្ងៃចុងក្រោយនេះ ម៉ិចស៊ិកបានរងនូវភ្លៀងធ្លាក់ជោគជាំ ធ្វើអោយមានទឹកជំនន់ស្ទើរតែគ្រប់ទីកន្លែង លិចផ្លូវថ្នល់ ស្ពាននិងព្រលានយន្តហោះជាច្រើនកន្លែង។ ព្យុះ”ម៉ានុយអេល” បានវាយប្រហារខ្លាំងជាងគេទៅលើរដ្ឋ Guerrero។ ក្នុងរដ្ឋហ្កេរេរ៉ូនេះ មានមនុស្ស៥៨នាក់ នៅភូមិឡា ពីនតាដា បានបាត់ខ្លួន ក្នុងហេតុការណ៍បាក់ស្រុតដី។
កាលពីថ្ងៃអង្គារ នៅក្រុងអាកាពុលកូ ដែលជាទីក្រុងទេសចរដ៏ល្បី ក្នុងរដ្ឋនេះដែរ មនុស្សរាប់ពាន់នាក់បាននាំគ្នាចូលទៅអគារពាណិជ្ជកម្មដែលលិចទឹក លួចយកម្ហូបអាហារ និងសម្ភារៈផ្សេងៗនៅទីនោះ។ អ្នកទេសចរក្នុងស្រុកនិងបរទេសប្រមាណ៤សែននាក់ បានជាប់ខ្លួននៅក្រុងអាកាពុលកូ។ អាជ្ញាធរបានរៀបចំជួយអោយអ្នកទេសចរប្រមាណ៥០០០នាក់ បានចាកចេញពីទីនោះ។
នៅថ្ងៃពុធនេះ នៅតំបន់ជុំវិញអាកាពុលកូ ឧត្ធម្ភាគចក្របានជួយសង្គ្រោះប្រជាជន១០០០នាក់ ដែលឡើងជ្រកខ្លួននៅតាមដំបូលផ្ទះ។ បញ្ហាដែលចោទនៅពេលនេះ គឺការខ្វះខាតទឹកស្អាត និងចំណីអាហារ ថ្វីដ្បិតតែកងទ័ពម៉ិចស៊ិកបានប្រកាសថា បានជួយជាចំណីអាហារប្រមាណ៦០តោន និងទឹក៨០០០លីត្ររួចហើយក៏ដោយចុះ៕ដោយ ព្រំ សឿន សូលីណា(RFI)