ហ្វ៊ូគូស្ហ៊ីម៉ា៖សេវារដ្ឋាភិបាលជប៉ុនដោះស្រាយបញ្ហាទឹកមានធាតុវិទ្យុសកម្ម បើកការប្រជុំលើកទីមួយ
នៅថ្ងៃ អង្គារនេះ សមាជិកនានានៃសេវាការងាររដ្ឋាភិបាលជប៉ុនដែលជាសេវាការងារថ្មីមួយ ទទួលបន្ទុកបញ្ហាទឹកមានធាតុវិទ្យុសកម្មនៅហ្វ៊ូគូស្ហ៊ីម៉ា បានជួបប្រជុំគ្នា កំណត់វិធានការដោះស្រាយជាក់ស្តែង អោយបានយ៉ាងយូរក្នុងដំណាច់ឆ្នាំ២០១៣នេះ។ បន្ទាប់ពីជប៉ុនបានត្រូវជ្រើសរើសអោយធ្វើជាម្ចាស់ផ្ទះរៀបចំការ ប្រកួតកីឡាអូឡាំពិក ឆ្នាំ២០២០មក នេះជាលើកទីមួយហើយ ដែលក្រុមការងារថ្មីនេះ បានជួបប្រជុំគ្នា។
នៅថ្ងៃ អង្គារនេះ ក្នុងការប្រជុំលើកដំបូងរបស់ខ្លួន សេវាការងាររដ្ឋាភិបាល ដែលជាសេវាការងារថ្មី ទទួលបន្ទុកដោះស្រាយបញ្ហាទឹកមានធាតុវិទ្យុសកម្មនៅហ្វ៊ូគីស្ហ៊ីម៉ា បានសំរេចអោយរដ្ឋមន្ត្រីឧស្សាហកម្មជប៉ុន គឺលោក តូស្ហ៊ីមីតស៊ូ ម៉ូតេហ្គី ធ្វើជាអ្នកដឹកនាំក្រុមការងារពិសេសមួយ លើបញ្ហានេះ។
កាលពីសប្តាហ៍មុន រដ្ឋាភិបាលជប៉ុនបានប្រកាសចាយវាយថវិកា ៣៦០លានអឺរ៉ូ ទប់ស្កាត់បញ្ហាធាតុវិទ្យុសកម្មនៅមជ្ឈមណ្ឌលនុយក្លេអ៊ែរ Fukushima។ រដ្ឋាភិបាលបានសំរេចនៅពេលថ្មីៗនេះថា នឹងឧបត្ថម្ភការសាងសង់ជញ្ជាំងទឹកកកមួយ នៅទីនោះ។ ជញ្ជាំងទឹកកកនេះខ័ណ្ឌចែកផ្នែកក្រោមដីនៃមជ្ឈមណ្ឌលអោយដាច់ចេញពី ទីកន្លែងដែលនៅជិតខាងក្បែរនោះ ហើយវាក៏ខ័ណ្ឌផ្នែកក្រោមដីនេះអោយដាច់ចេញពីសមុទ្រផងដែរ។ រដ្ឋាភិបាលក៏សំរេចពង្រឹងមធ្យោបាយបន្សាបធាតុវិទ្យុសកម្មក្នុងទឹក ដែលលេចចេញនៅទីនោះផងដែរ។
កន្លងមក ទឹកមានជាតិពុល៤សែនតោន បានលេចចេញនៅក្រោមដីនៅមជ្ឈមណ្ឌល ហើយត្រូវបានយកស្តុកទុកក្នុងអាងទឹកប្រមាណជាមួយពាន់។ មួយភាគនៃបរិមាណទឹកនេះ ហូរចូលទៅសមុទ្ររាល់ថ្ងៃ ដោយសារតែជប៉ុនខ្វះខាតមធ្យោបាយទប់ទឹក។ លើសពីនេះ សកម្មភាពធ្វើអោយត្រជាក់ដល់ម៉ាស៊ីនប្រតិករនុយក្លេអ៊ែរនានានៅ មជ្ឈមណ្ឌល បានធ្វើអោយទឹកមានធាតុវិទ្យុសកម្មនៅតែលេចចេញមករៀងរាល់ថ្ងៃ។
រដ្ឋាភិបាលសំរេចចិត្តលូកដៃដោះស្រាយបញ្ហានេះដោយផ្ទាល់ជាមួយ ក្រុមហ៊ុនថាមពលអគ្គិសនីជប៉ុន តេបកូ។ ទោះយ៉ាងនេះក្តី នាយករដ្ឋមន្ត្រីជប៉ុនធ្លាប់បានប្រាប់នៅពីមុខគណៈកម្មាធិការអន្តរជាតិកីឡាអូឡាំ ពិក ថា បញ្ហានេះត្រូវបានគ្រប់គ្រងហើយ។
ពីរថ្ងៃបន្ទាប់ពីជប៉ុនបានត្រូវជ្រើសរើសអោយធ្វើជាម្ចាស់ផ្ទះរៀបចំ កីឡាអូឡាំពិកឆ្នាំ២០២០មក ការប្រជុំសេវារដ្ឋាភិបាលនៅថ្ងៃអង្គារនេះបង្ហាញថា រដ្ឋាភិបាលលោកអាបេមានជំហរមោះមុត ដើម្បីដោះស្រាយបញ្ហាអោយបានចប់សព្វគ្រប់ជាស្ថាពរ ចៀសវាងប៉ះពាល់ដល់ការប្រកួតកីឡាអូឡាំពិក នៅពេលអនាគត៕ដោយ ព្រំ សឿន សូលីណា(RFI)
