យុគ ចិន្តា ប្រកាសដកខ្លួនចេញពីប្រកួតកម្មវិធីពានអាណាចក្រតារាឆ្នាំ២០១៤
ភ្នំពេញ៖ ពិធីការិនីលេចធ្លោ អ្នកនាងយុគ ចិន្តា បានប្រកាសមិនចូលរួមការប្រកួតប្រជែងកម្មវិធីអាណាចក្រតារាសម្រាប់ឆ្នាំក្រោយនេះឡើយ ដោយសារតែនាងចង់ទុកឱកាសឲ្យដល់អ្នកសិល្បះជំនាន់ក្រោយ។
ការប្រកាសរបស់ពិធីការិនីមិនចេះរីងស្ងួនរូបនេះធ្វើឡើងបន្ទាប់ពីនាងទើប ទើបតែទទួលបានតំណែងជាពិធីការិនីឆ្នើមលេចធ្លោដាច់គេ សម្រាប់ឆ្នាំ២០១៣នេះនៃកម្មវិធីអាណាចក្រតារា ។
ផ្ទុយពីតារាមួយចំនួន អ្នកនាងយុគ ចិន្តាដែលបានអះអាងថានឹងមិនបញ្ចូលឈ្មោះធ្វើជាតារាប្រកួតប្រជែងអីទៀតទេបើសិនជាកម្មវិធីអាណាចក្រតារាមាននៅឆ្នាំ២០១៤ខាងមុខ។នាងបញ្ជាក់ថា ការទទួលពានកន្លងទៅល្មមធ្វើឲ្យយើងស្ងប់ចិត្តទុកឱកាសដល់អ្នកថ្មីវិញម្តងដើម្បីចែករំលែកស្នាដៃអ្នកជំនាន់ក្រោយ។
កាលពីអ្នកនាងយុគ ចិន្តាគ្រងពានជាពិធីការិនីឆ្នើមឆ្នាំ២០១៣អ្នកនាងបានបញ្ជាក់ប្រាប់អ្នកគាំទ្រគ្រប់ស្រទាប់ទាំងអស់ដែលកំពុងតែទស្សនាតាមកញ្ចក់ទូរទស្សន៍ថា ជាង២២ឆ្នាំហើយដែលអ្នកនាងប្រឹងប្រែងលើអាជីពពិធីការិនីនេះមានទាំងល្វីងជូរចត់ផ្អែមសប្បាយកើតទុក្ខនិងការតស៊ូគ្រប់យ៉ាងទើបមានថ្ងៃនេះ។អ្វីដែលសំ ខាន់អ្នកនាងបានផ្តាំផ្ញើឲ្យប្អូនៗជំនាន់ក្រោយត្រូវតស៊ូអត់ធ្មត់ចាប់យកជ័យជំនះចំនែកអ្នកនាងនិងមិនភ្លេចខ្លួនព្រងើយកន្តើយនោះទេនៅតែប្រឹងបញ្ចេញស្នាដៃតទៅទៀត។
ពិធីការិនីចាស់វស្សា អ្នកនាងយុគ ចិន្តា បានអះអាងថាអ្នកនាងទទួលបានភាពលេចធ្លោឲ្យតម្លៃពីសំណាក់មហាជនរហូតដល់ថ្នាក់បានពានពីការប្រកួតប្រជែងកាលពីពេលកន្លងទៅនេះគឺល្មមឲ្យនាងរីករាយសប្បាយចិត្ត ហើយមានន័យថាធ្វើការយូរហើយគួរតែមានស្នាដៃប្រចាំជីវិតដូចករណីខាងលើនេះ។ អ្នកនាងមានប្រវត្តិបានពានក្នុងនាមអ្នកសិល្បៈតាមពេលវេលាផ្តល់ជូនគឺពិសេសណាស់សម្រាប់យើងនិងសំខាន់ទៅថ្ងៃក្រោយទោះជាលែងនឹកនាសិល្បៈក៍យើងមានស្នាដៃបន្សល់ទុកសម្រាប់រំលឹកអនុស្សាវរីយ៍៕ ស.រ/Cambodia News
