អាមេរិកគំរាមវាយប្រហារលើស៊ីរី តែក្រុងដាម៉ាស ព្រមានវាយបកវិញ
ការប្រឈមមុខដាក់គ្នារវាងអាមេរិក និងស៊ីរីមានសភាពកាន់តែធ្ងន់ធ្ងរឡើងហើយនៅពេលនេះ។ ទីក្រុងវ៉ាស៊ីនតោនបានចោទប្រកាន់ស៊ីរីដោយត្រង់ៗនិងលើកដំបូងកាលពី ថ្ងៃអង្គារថា បានប្រើអាវុធគីមីប្រឆាំង នឹងពួកឧទ្ទាម និងបានព្រមានបើកប្រតិបត្តិការយោធាទៅលើកងទ័ពស៊ីរី។ ប៉ុន្តែ ទីក្រុងដាម៉ាស់បានព្រមានតបវិញថា ខ្លួននឹងវាយតបវិញដោយមធ្យោបាយគួរឲ្យភ្ញាក់ផ្អើលដើម្បីការពារ ខ្លួន។
នេះជាលើកដំបូងហើយដែល រដ្ឋាភិបាលក្រុងវ៉ាស៊ីនតោនបានចោទប្រកាន់ ដោយផ្ទាល់និងជាចំហទៅលើទីក្រុងដាម៉ាសអំពីការប្រើប្រាស់អាវុធគីមី និងគំរាមវាយប្រហារ។ លោក Joe Biden អនុប្រធានាធិបតីអាមេរិកបានប្រកាសថា អ្នកទទួលខុសត្រូវក្នុងការប្រើអាវុធគីមីគឺជារដ្ឋាភិបាលស៊ីរី។ លោកបានថ្លែងទៀតថា អ្នកប្រើអាវុធគីមីប្រឆាំងនឹងមនុស្ស ជាពិសេសស្ត្រី និងកុមារ ត្រូវតែទទួលផលវិញសមនឹងអ្វីដែលពួកគេបានធ្វើ។
រដ្ឋាភិបាលលោក អូបាម៉ា គ្រោងនឹងចេញរបាយការណ៍មួយផ្នែករបស់ខ្លួននៅក្នុងសប្តាហ៍នេះដើម្បី បង្ហាញព័ត៌មាននានាដែលទីភ្នាក់ងារសម្ងាត់ទទួលបានទាក់ទងនឹងការទទួល ខុសត្រូវរបស់រដ្ឋាភិបាលស៊ីរីក្នុងការប្រើប្រាស់អាវុធគីមី។ ទន្ទឹមនឹងនេះដែរ សហរដ្ឋអាមេរិកបានត្រៀមជាស្រេចហើយក្នុងការបើកប្រតិបត្តិការយោធាទៅលើ ប្រទេសស៊ីរី។ លោក Chuck Hagel រដ្ឋមន្ត្រីក្រសួងការពារប្រទេសអាមេរិកបានអះអាងថា កងទ័ពអាមេរិកបានត្រៀមគ្រប់ស្ថានភាពអស់ហើយដោយរង់ចាំតែបទបញ្ជាពី ប្រធានាធិបតីអូបាម៉ាតែប៉ុណ្ណោះ។
ប៉ុន្តែ លោក អូបាម៉ា នៅមិនទាន់សម្រេចថានឹងត្រូវបើកប្រតិបត្តិការយោធានៅពេលណានៅឡើយទេ។ លោកកំពុងតែពិភាក្សាជាមួយដៃគូសម្ពន្ធ័មិត្តជាពិសេសអង់គ្លេស និងបារាំងដើម្បីឲ្យពួកគេចូលរួមនៅក្នុងប្រតិបត្តិការនេះ។ ទីក្រុងឡុងនឹងប៉ារីសបានផ្តល់សញ្ញាជាវិជ្ជមានចំពោះប្រតិបត្តិការ យោធាទៅលើប្រទេសស៊ីរី។ ប៉ុន្តែ ប្រទេសរុស្ស៊ីបានជំទាស់យ៉ាងដាច់ខាត។
ប្រឈមមុខទៅនឹងការត្រៀមលក្ខណៈវាយប្រហារទៅលើប្រទេសរបស់ខ្លួន រដ្ឋាភិបាលក្រុងដាម៉ាស់របស់ លោក Bachar al-Assad បានព្រមានតបវិញថា នឹងប្រើមធ្យោបាយតបតវិញ។ រដ្ឋមន្ត្រីការបរទេសស៊ីរីបានអះអាងថា រដ្ឋាភិបាលរបស់លោកនឹងប្រើប្រាស់ការតបតវិញដោយមធ្យោបាយគួរឲ្យ ភ្ញាក់ផ្អើលមួយប្រសិនបើអាមេរិក និងសម្ពន្ធមិត្តបើកការវាយប្រហារទៅលើប្រទេសរបស់ខ្លួនមែននោះ។ ប្រឈមមុខនឹងស្ថានការណ៍ដ៏តានតឹងនេះ ប្រជាជនស៊ីរីកំពុងព្រួយបារម្ភ និងភ័យខ្លាចយ៉ាងខ្លាំង៕ដោយ ប៉ែន បូណា (RFI)