យូរី ភ័យខ្លាចអត់មាន អ្នកស្រឡាញ់
ភ្នំពេញ៖ តារាចម្រៀងវ័យក្មេង សាច់សច្រមុះស្រួច កញ្ញា យូរី កន្លងមកតែងតែ មានបណ្តាញព័ត៌មាន ក្នុងស្រុក មួយចំនួនចុះផ្សាយថា នាងមាន ទំនាក់ទំនងស្នេហា ជាមួយអ្នកនេះ ជាមួយអ្នកនោះ ជាហូរហែ មិនតែប៉ុណ្ណោះ ក៏មានព័ត៌មាន លេចឮថា នាងមានទំនាក់ទំនង ជាមួយឧកញ៉ា និងអ្នកជំនួញ ម្នាក់ផងដែរ ។
ប៉ុន្តែទោះជាយ៉ាងណា ចំពោះព័ត៌មានដែរលេចឮ ចេញមកខាងក្រៅ ជាហូរហែទាំងអស់នេះ ត្រូវបានតារាចម្រៀង ក្រមិចក្រមើម យូរី ចេញមុខបដិសេធ រួចទៅហើយ ដោយនាងបានអះអាងថា នាងគ្មានទំនាក់ទំនង ស្នេហាជាមួយបុរស ណាម្នាក់ឡើយ ។
ជុំវិញរឿងស្នេហានេះដែរ ស្រីស្រស់សាច់ សសម្បូរមន្តស្នេហ៍ កញ្ញា យូរី បានបញ្ជាក់ ឲ្យដឹងតាមទូរស័ព្ទថា ”ចំពោះព័ត៌មាន ដែលគេនិយាយថា ខ្ញុំមានទំនាក់ទំនងស្នេហាជា មួយបង អាន គុណកូឡា នោះ គឺជារឿងមិនពិតនោះទេ ។
តាមពិតទៅគេគ្រាន់តែ យល់ច្រឡំប៉ុណ្ណោះ ព្រោះអីខ្ញុំបានសម្តែងក្នុងបទ សង្សារមួយថ្ងៃ សង្សារមួយជីវិត ជាមួយគាត់គេមើលទៅសមគ្នា គេក៏និយាយអ៊ីចឹងទៅ ។ ប៉ុន្តែរឿងពិត គឺមិនដូចតាមការសម្តែង នៅក្នុងបទចម្រៀងនោះទេ ចំពោះការដើរលេង នាងក៏មិនបានទៅ ជាមួយ កូឡា តែពីរនាក់ដែរ បើទៅ គឺទៅលក្ខណៈក្រុមការងារតែម្តង។
ម្ចាស់បទ សង្សារមួយថ្ងៃ សង្សារមួយជីវិត កញ្ញា យូរី បានបន្តថា ”ជុំវិញព័ត៌មានហ្នឹង ខ្ញុំនឹងចេញមុខ បកស្រាយឲ្យបានច្បាស់ម្តងទៀត នៅលើកញ្ចក់ ទូរទស្សន៍ ក្នុងកម្មវិធី ”រាត្រីកម្សាន្ត” នៅថ្ងៃអាទិត្យខាងមុខ ដើម្បីកុំឲ្យមហាជន និងមិត្តៗយុវវ័យយល់ ច្រឡំតទៅទៀត” ។
យូរី បាននិយាយ លាយឡំនឹងសំណើច តិចៗថា ”ខ្ញុំគ្មានហុងស៊ុយទេ រឿងស្នេហាហ្នឹង ព្រោះអីខាងសារព័ត៌មាន បានចុះផ្សាយថា ខ្ញុំមានស្នេហា ជាមួយបង អាន គុណកូឡា អ៊ីចឹងហើយក៏គ្មាននរណា ហ៊ានស្រឡាញ់ខ្ញុំដែរ បើខាងសារព័ត៌មាន ចុះផ្សាយយ៉ាងដូច្នេះ លែងមានអ្នកស្រឡាញ់ខ្ញុំហើយ” ។
កញ្ញា យូរី បានបង្ហើបប្រាប់ថា បច្ចុប្បន្នការងារ សិល្បៈរបស់នាង គឺមានការមមារញឹកខ្លាំង ព្រោះនាងជាប់ថតខ្សែ ភាពយន្ត នៅក្នុងផលិតកម្មសាន់ដេ។ ចំពោះការចេញទៅច្រៀង នៅតាមខេត្តពេលនេះ មិនសូវមាននោះទេ ដោយសារតែ ជារដូវធ្លាក់ភ្លៀងច្រើន ។ ប៉ុន្តែតារាចម្រៀងរូបនេះ ឲ្យដឹងថា នៅថ្ងៃទី១ខែកញ្ញា ខាងមុខនេះ នាងត្រូវចូលរួមច្រៀង ក្នុងកម្មវិធី សឹង្ហាបៀរ នៅមជ្ឈមណ្ឌល កោះពេជ្រ និងប៉ះជាមួយ តារាចម្រៀង មកពីប្រទេសថៃ ផងដែរ ៕ ស.រ/Cambodia News
