សន្តិសុខនៅតែរឹតបន្តឹងនៅពេល លោក សម រង្ស៊ីលើកពេលចូលកម្ពុជា
ភ្នំពេញ៖ កំលាំងសមត្ថកិច្ចនគរបាលទាំងក្រុមៗ ត្រូវគេដាក់ពង្រាយនៅពាសពេញរាជធានី បន្ទាប់ពីមានការប្រកាសកាន់តែសន្ធាប់ទៅពីសំណាក់មេដឹកនាំ គណបក្សប្រឆាំងថានឹងត្រៀមធ្វើបាតុកម្មទ្រង់ទ្រាយធំប្រសិនបើ ភាពមិនប្រក្រតីនៃការបោះឆ្នោត មិនត្រូវបានដោះស្រាយ។
ជួនពេលដែលគណបក្សសង្គ្រោះជាតិប្រកាសថាមេដឹកនាំរបស់ខ្លួនលោក សម រង្សី នឹងវិលត្រលប់ចូលប្រទេសវិញនៅថ្ងៃ ប្រហស្បតិ៍ទី ១៥ សីហានេះ កងកំលាំងសន្តិសុខ ហាក់ដូចមានការបង្កើនយ៉ាងច្រើនសន្ធឹកសន្ធាប់ បើទោះណាជាការវិលត្រលប់របស់លោក សម រង្សី ត្រូវបានលើកទៅថ្ងៃក្រោយក៏ដោយ។
នៅលើសួមច្បារវត្តបុទុមវតី នគរបាលទាំងកងៗ ត្រូវបានដាក់ឲ្យមានការប្រុងប្រយ័ត្ន មេបញ្ជាការបានកោះប្រជុំជួរជាញឹកញាប់ដើម្បីធ្វើការណែនាំនៅក្រោម សំពត់តង់ព័ណ៌សរាងទ្រវែង ដែលមើលទៅហាក់ដូចជាជំរុំទ័ព ដែលបោះទីតាំងដើម្បីត្រៀមប្រយុទ្ធនឹងអ្វីមួយ។
ក្រឡេកទៅមើលក្បែរផ្លូវចូលទៅកាន់សួនកុមារនៅទល់មុខអគាររដ្ឋសភា ចាស់វិញ រថយន្តអគ្គីភ័យ ពីបីទៅបួនគ្រឿងក៏ត្រូវគេដាក់តម្រៀបគ្នាជាមួយនឹងវត្តមានកងកំលាំង ជាច្រើននៅទីនោះផងដែរ។ រូបភាពបែបនេះគ្មាននរណាមួយមិនដឹងនោះទេ ដោយអ្នកលក់ដូរនៅទីនោះនិយាយដូចៗគ្នាថា ជាការដាក់កំលាំងសមត្ថកិច្ចខុសពី ប្រក្រតីភាពចំពេល ដែលមានការប្រកាសធ្វើបាតុកម្មរបស់ លោក សម រង្សី។
លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃធ្លាប់បានប្រកាសកន្លងមកនេះថា ការ ពង្រាយកំលាំងសន្តិសុខជាច្រើនកន្លែង គឺក្នុងគោលបំណងរក្សាសន្តិសុខ និងសណ្តាប់ធ្នាប់សាធារណៈ ខណៈដែលមានការផ្សព្វផ្សាយពីមេដឹកនាំគណបក្សជាច្រើនដងពីគំរោងធ្វើ មហាបាតុកម្ម តវ៉ានឹងលទ្ធផលបោះឆ្នោត៕ នាង/Cambodia News
