រកឃើញករណីឆ្លងជំងឺផ្តាសាយបក្សី ២ករណីថ្មីទៀត កើតទៅលើកុមារ ពីរនាក់
ភ្នំពេញ៖ ក្រសួងសុខាភិបាល និងអង្គការសុខភាពពិភពលោក នៅថ្ងៃទី១៣ ខែសីហា នេះបានចេញសេចក្តីប្រកាស ព័ត៌មានរួមគ្នាឲ្យដឹងថា បានរកឃើញករណីឆ្លងជំងឺផ្តាសាយបក្សីចំនួន ២ករណីថ្មីទៀត ក្នុងឆ្នាំ២០១៣នេះ ដោយ កើតទៅលើកុមារមានអាយុ៩ឆ្នាំ និង៥ឆ្នាំ នៅក្នុងខេត្តបាត់ដំបង និងខេត្តកណ្តាល។
ការឆ្លងវីរុសផ្តាសាយបក្សី ដែលជាករណីទី១៥ បានកើតលើកុមារាអាយុ ៩ឆ្នាំ រស់នៅក្នុងភូមិដំណាក់ ដង្កោរ ឃុំរាំងកេសី ស្រុកសង្កែ ខេត្តបាត់ដំបង។ កុមារា បានចាប់ផ្តើមឈឺនៅថ្ងៃទី២៦ ខែកក្កដា ឆ្នាំ២០១៣ ដោយមានគ្រុនក្តៅ និងក្អួត ហើយបានទទួលការព្យាបាលដោយបុគ្គលិកមណ្ឌលសុខភាពរាំងកេសី។ ដោយសារតែស្ថានភាពជំងឺ នៅតែមានសភាពធ្ងន់ធ្ងរ ក្រុមគ្រួសារ បញ្ជូនកុមារា ទៅព្យាបាលនៅមន្ទីរពេទ្យនៅខេត្តសៀមរាបបន្តទៀត។
រីឯករណីទី១៦ បានកើតទៅលើកុមារី មានអាយុ ៥ឆ្នាំ រស់នៅភូមិក្នុងព្រែក ឃុំព្រែកគយ ស្រុកស្អាង ខេត្តកណ្តាល ។ កុមារីរូបនេះ ចាប់ផ្តើមឈឺនៅថ្ងៃទី១ ខែសីហា ឆ្នាំ២០១៣ ដោយមានគ្រុនក្តៅ ហើយទទួលការព្យាបាលនៅ មណ្ឌលសុខភាព និងបានទទួលការព្យាបាលនៅមន្ទីពេទ្យឯកជន។ ប៉ុន្តែស្ថានភាពជំងឺនៅតែមានសភាពធ្ងន់ធ្ងរ គេ ក៏បានបញ្ជូនកុមារីនោះ មកព្យាបាលបន្តទៅមន្ទីរពេទ្យគន្ធបុប្ផារាជធានីភ្នំពេញ។
លោក ម៉ម ប៊ុនហេង រដ្ឋមន្រ្តីក្រសួងសុខាភិបាល បានមានប្រសាសន៍ ក្នុងសេចក្តីប្រកាសព័ត៌មាន ថា « ជំងឺផ្តាសាយបក្សី នៅតែបន្តគំរាមកំហែងដល់សុខភាពប្រជាពលរដ្ឋកម្ពុជា និងកើតមានច្រើនលើកុមារ ហើយនេះ គឺជាករណីទី១៥ និងទី១៦ ដែលកើតទៅលើមនុស្សនៅឆ្នាំ២០១៣នេះ»។
សេចក្តីប្រកាសព័ត៌មានបញ្ជាក់ទៀតថា នេះជាករណីទី១៥ និងទី១៦ ក្នុងឆ្នាំ២០១៣នេះ និងជាករណីទី៣៦ និង ៣៧ ដែលឆ្លងវីរុសផ្តាសាយបក្សី H5N1នៅកម្ពុជា។ ២៦កណី ក្នុងចំណោមករណីផ្តាសាយបក្សីទាំង៣៧ ដែល កើតមានឡើងនៅកម្ពុជា កើតលើកុមារអាយុក្រោម១៤ឆ្នាំ ហើយ ២២ករណីក្នុងចំណោមករណីគ្រុនផ្តាសាយបក្សី ទាំង៣៧ ជានារី។ មានតែ៧ករណីក្នុងចំណោម១៦ករណីក្នុងឆ្នាំ២០១៣នេះ រស់រានមានជីវិត៕ Cambodia News
