គណបក្សសង្គ្រោះជាតិ ប្រកាសមិនទទួលស្គាល់លទ្ឋផលបណ្តោះអាសន្ន
ភ្នំពេញ៖ បន្ទាប់ពី គ.ជ.ប បានធ្វើការប្រកាសលទ្ធផបណ្តោះអាសន្នកាលពីព្រឹកថ្ងៃទី១២ ខែសីហានេះ គណបក្សសង្គ្រោះជាតិ បានប្រកាសជំទាស់លទ្ធផលនៃការបោះឆ្នោតបណ្តោះអាសន្ន ដែលលទ្ធផលបណ្តោះអាសន្នបានបង្ហាញថា គណបក្សប្រជាជនកម្ពុជាឈ្នះការបោះឆ្នោត។
គណបក្សសង្គ្រោះជាតិ បានធ្វើសន្និសីទមួយភ្លាម ក្រោយពី គ.ជ.ប បានប្រកាសលទ្ធផលបោះឆ្នោតបណ្តោះអាសន្ន ដែលបង្ហាញបានពីសំឡេងឆ្នោតរបស់គណបក្សនយោបាយទាំង ៨ នៅតាមបណ្តាខេត្តទូទាំង ២៤ រាជធានីខេត្ត សម្រាប់ថ្ងៃបោះឆ្នោត ថ្ងៃទី២៨ កក្កដា កន្លងមក។
នៅក្នុង សន្និសីទកាសែតនោះ លោក កឹម សុខា ប្រធានស្តីទីគណបក្សសង្គ្រោះជាតិ បានប្រកាសពីការខកចិត្ត ហើយថា គណបក្សសង្គ្រោះជាតិបានប្រកាសជំទាស់នឹងលទ្ធផលបណ្តោះអាសន្ននេះ។
យោងទៅតាម លទ្ធផលដែលប្រកាសដោយ គ.ជ.ប និងរូបមន្តបែងចែកអាសនៈនៅក្នុងច្បាប់បោះឆ្នោត អ្នកសង្កេតការណ៍បានគណនាឃើញថា ចំនួនអាសនៈដែលគណបក្សប្រជាជនទទួលបាន គឺ ៦៨ ហើយគណបក្សសង្គ្រោះជាតិទទួលបានចំនួន ៥៥ ដោយមិនមានអ្វីប្រែប្រួលឡើយ បើទោះបីជាសំឡេងឆ្នោតមានការប្រែប្រួលបន្តិចបន្តួចក្តី។
លោក កឹម សុខា មិនបានប្រកាសអំពីគម្រោងណាមួយទាក់ទងនឹងការធ្វើមហាបាតុកម្មនោះទេ។ លោកក៏បាននិយាយដែរថា លោក សម រង្ស៊ី នឹងវិលត្រឡប់មកកម្ពុជាវិញ នៅក្នុងសប្តាហ៍នេះប៉ុន្តែលោក មិនបានផ្តល់កាលបរិច្ឆេទច្បាស់លាស់ទេ៕ Cambodia News