ឪពុកបង្កើតច្របាច់កសម្លាប់កូនស្រី៣នាក់ រួចចងកសម្លាប់ខ្លួនឯងជាក្រោយ
សារព័ត៌មាន Cambodia News/
ភ្នំពេញ ៖ អំពើឃាតកម្មដ៏សាហាវមួយដោយឪពុកបង្កើតបានច្របាច់កកូនស្រី៣នាក់ រហូតស្លាប់ហើយបានចងកសម្លាប់ខ្លួនឯងជាក្រោយបានបង្កការភ្ញាក់ផ្អើលកាលពីវេលាម៉ោង១០,២០នាទីយប់ថ្ងៃទី២៦ ខែសីហា ឆ្នាំ២០២០ ស្ថិតនៅក្នុងភូមិឧញ៉ា វាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
កូនស្រីទាំង៣នាក់ ដែលត្រូវឪពុកសម្លាប់ ១/ កូនស្រីទី១ ឈ្មោះ ជុំ ម៉េងជូ អាយុ១៦ឆ្នាំ , ២/ កូនស្រីទី២ ឈ្មោះ ជុំ ម៉េងចិន អាយុ៥ឆ្នាំ និងកូនស្រីទី៣ឈ្មោះ ជុំ ម៉េងជៀន អាយុ៤ឆ្នាំ ចំណែកឪពុកឈ្មោះ ជា សុខជុំ អាយុ៤០ឆ្នាំ មុខរបររត់កង់បី ។
តាមសំដីប្រពន្ធជនរងគ្រោះ និងជាម្តាយកូនស្រីទាំង៣ មានឈ្មោះ ឌីម សុខនាថ ប្រាប់សមត្ថកិច្ចថា មុនពេលកើតហេតុ នៅវេលាម៉ោង២០៖៣០នាទីយប់ ខ្លួនត្រឡប់មកពីធ្វើការវិញ ពេលមកដល់ផ្ទះឃើញទ្វារផ្ទះបិទ ក៏ស្រែកហៅកូនៗ តែមិនឮសំឡេងឆ្លើយ ខ្លួនបានរុញច្រានទ្វារហូតរបើកទ្វារ ភ្លាមនោះក៏ចូលទៅក្នុងបន្ទប់ស្រាប់តែឃើញជនរងគ្រោះជាប្ដី បានចងកស្លាប់បាត់ហើយ រីឯកូនស្រី២នាក់ ក៏ឃើញស្លាប់នៅលើគ្រែ និងកូនស្រីច្បង ស្លាប់នៅលើបន្ទប់ឡៅតឿ ពេលនោះខ្លួនបានទៅហៅប្អូនថ្លៃស្រី ដែលជួលបន្ទប់ក្បែរគ្នាឲ្យមកជួយ និងស្រែកឆោឡោឲ្យអ្នកជិតខាងមកជួយ ក៏ធ្វើឲ្យមានការភ្ញាក់ផ្អើលតែម្ដង និង បានរាយការណ៍ទៅសមត្ថកិច្ចជំនាញចុះទៅដល់កន្លែងកើតហេតុ។
សមត្ថកិច្ចបានធ្វើកោសល្យវិច្ឆ័យ ហើយបានសន្និដ្ឋានថា ជនរងគ្រោះជាកូនទាំង០៣នាក់ បានស្លាប់ដោយសារច្របាច់ក ចំណែកជនសង្ស័យក្រោយធ្វើសកម្មភាពរួច បានធ្វើអត្តឃាតចងកសម្លាប់ខ្លួននៅកន្លែងកើតហេតុតែម្ដង។
សពទាំង០៤នាក់ សមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅ ស្រុកស្រីសន្ធរ ខេត្តកំពង់ចាម៕
