ប្រជាជនមកពីសហគមន៍បីធ្វើបាតុកម្មតវ៉ានៅមុខតុលាការកំពូល
ភ្នំពេញ៖ ប្រជាជមកពីសហគមន៍ចំនួនបី គឺសហគមន៍បឹងកក់ បុរីកីឡា និង ថ្មគោល បាននាំគ្នាធ្វើបាតុកម្មតវ៉ានៅខាងមុខតុលាការកំពូលនៅថ្ងៃទី ១២ ខែសីហានេះ ដើម្បីទាមទារឲ្យដោះលែងអ្នកស្រី យ៉ោម បុប្ផា ដែលជាសកម្មជនតវ៉ាដីធ្លីបុរីកីឡា។
បើតាមសម្ដីរបស់អ្នកស្រី ទេព វន្នី ដែលជាអ្នកតំណាងសកម្មជនតវ៉ាដីធ្លីនៅបឹងកក់បានឲ្យដឹងថាការធ្វើបាតុកម្មថ្ងៃនេះ ព្រោះនៅថ្ងៃទី១១ ខែកក្ដដាពួកអ្នកស្រីបានយកពាក្យបណ្ដឹងទៅដាក់នៅតុលាការកំពូលដើម្បីពន្លឿនការកាត់ក្តី តែរហូតមកដល់ថ្ងៃនេះនៅតែមិនទាន់មានដំណឹង ឬដំណោះស្រាយអ្វីឡើយ។
អ្នកស្រី ទេព វន្នី បានបន្តថា អ្នកស្រីនិងគ្នាចំនួន ៤នាក់មានដូចអ្នកស្រី ប៉ូវ សោភា អ្នកស្រីគង់ ចន្ថា អ្នកស្រី បូ ឆវី និងលោក លួស សាខន ដែលជាស្វាមីរបស់អ្នកស្រី យ៉ោម បុប្ផា បានចូលជួបជាមួយតុលាការកំពូល ដើម្បីស្នើឲ្យមានការដោះលែងអ្នកស្រី យ៉ោម បុប្ផា។
អ្នកស្រីបានបន្ថែមថា « ព្រឹកនេះតុលាកំពូលការបានឲ្យលិខិត (សារណា) ដើម្បីឲ្យគ្រួសាររបស់បង បុប្ផា រៀបចំសរសេរពីបញ្ហាដែលមិនទទួលយក ពីការកាត់ក្ដីរបស់តុលាការដំបូង ឬក៏តុលាការឧទ្ធរដើម្បីឲ្យតុលាការកំពូលបើកសវនាការឲ្យបានឆាប់រហ័ស។»
សុំណំរឿងទាក់ទងទៅនឹងការចាប់ឃុំខ្លួនអ្នកស្រី យ៉ោម បុប្ផា បានបញ្ជូនមកដល់តុលាការកំពូល ហើយអង្គការលីកាដូក៏បានធ្វើការស្រាវជ្រាវអំពីសំណុំរឿងនេះ ហើយមេធាវីលីកាដូ ក៏បានតាដានការពារអ្នកស្រី យ៉ោម បុប្ផាដែរ។
បើតាមសម្ដីរបស់លោក អំ សំអាត ដែលជាអ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស របស់អង្គការ លីកាដូ បានឲ្យដឹងថា នៅថ្ងៃកើតហេតុគឺពិតជាមានអំពើរហឹង្សា ស្ថិតក្នុងស្ថានទំងន់ទោសកើតឡើងនៅកន្លែងនោះមែន តែជនល្មើសមិនមែនជាអ្នស្រីយ៉ោមបុប្ផាទេ។
លោក សំអាត បានបន្តថា មិនមានភស្តុតាងណា ដែលអាចចង្អុលបង្ហាញថា អ្នកស្រី យ៉ោម បុប្ផា ពាក់ពន្ធ័នៅក្នុងករណីហ្នឹងទេ ព្រោះមិនមានសាក្សីណា ដែលអាចថាអ្នកស្រីជាអ្នកបញ្ជារ ឬ ជាអ្នកប្រព្រឹត្តឡើយ។
លោកបានបន្ថែមថា សូម្បីតែជនរងគ្រោះក៏បានអះអាងដែរថាជនល្មើសមិនមែនជា អ្នកស្រី យ៉ោម បុប្ផាទេ គឺជាបុរសពីរនាក់ផ្សេង ហើយអ្នកស្រី បុប្ផា និងជនរងគ្រោះក៏មិនបានស្គាល់គ្នាដែរ។
គួរបញ្ជាក់ផងដែរថា បាតុកម្មនេះត្រូវបានធ្វើឡើងតាំងពីម៉ោង ៨:៣០នាទីរហូតដល់ ម៉ោង ១១: ០០ព្រឹកដើម្បីទាមទារការដោះលែងអ្នកស្រីយ៉ោម បុប្ផា ដែលត្រូវបានជាប់ឃុំខ្លួនជិត១ឆ្នាំមកដល់ថ្ងៃនេះ។ ហើយបាតុកម្មនេះមានប្រជាជនភាគច្រើនមកពីសហគមន៍បឹងកក់ ហើយមកពីបុរីកីឡាចំនួន ៣០នាក់ នឹងមកពីថ្មគោលចំនួន ៣នាក់ចូលរួម៕ បេឡា/Cambodia News
