យុវជន ២នាក់ត្រូវសមត្ថកិច្ចឃាត់ខ្លួន
ភ្នំពេញ៖ កាលពីវេលាម៉ោង ២៣និង០០នាទីយប់ ថ្ងៃទី២៥ ខែមករា យុវជន២នាក់ត្រូវសមត្ថកិច្ចនគរបាលប៉ុស្តិ៍បឹងរាំង ខណ្ឌដូនពេញ ឃាត់ខ្លួនបាន នៅចំណុចមុខសណ្ឋាគារព្រីនសេស ស្ថិតលើកំណាត់ផ្លូវព្រះមុនីវង្សកែងផ្លូវលេខ២២៨ ស្ថិតក្នុងសង្កាត់បឹងរាំង ខណ្ឌដូនពេញ។
យុវជនពីរនាក់ដែលសមត្ថកិច្ចឃាត់ខ្លួនបានខាងលើនេះ ទី១ឈ្មោះ ខន ហ្គោវ៉ាន់ដា អាយុ២៣ឆ្នាំ និងទី២ឈ្មោះ ជាម ទិតធារិទ្ធ អាយុ២២ឆ្នាំ ទាំងពីរនាក់មានមុខរបរនិងទីកន្លែងរស់នៅមិនពិតប្រាកដ។
ប្រភពពត៌មានទាក់ទិននឹងករណីឆក់ខាងលើនេះ បានឲ្យដឹងថា មុនពេលកើតហេតុ គេសង្កេតឃើញជនជាតិបរទេស១ក្រុម មានគ្នា៣នាក់ ជិះម៉ូតូកង់បី ធ្វើដំណើរលើកំណាត់ផ្លូវព្រះមុនីវង្ស ក្នុងទិសដៅពីត្បូងទៅជើង លុះដល់ចំណុចកើតហេតុខាងលើ ក៏ត្រូវចោរឈ្មោះខន ហ្គោវ៉ាន់ដា និងជាម ទិតធារិទ្ធ បាននាំគ្នាជិះម៉ូតូម៉ាកសេ១២៥ ពណ៌ខ្មៅ ស៊េរី២០១៣ ធ្វើដំណើរស្របទិសគ្នា លុះពេលមកដល់ទន្ទឹមគ្នា ស្រាប់តែពួកគេធ្វើសកម្មភាពឡូកឆក់ទូរស័ព្ទ ដៃអាយហ្វូន (Iphone) ពីជនជាតិបរទេស ដែលកំពុងជិះម៉ូតូកង់បី មិនបានសម្រេចបណ្ដាលឲ្យដួលម៉ូតូ ហើយត្រូវប្រជាពលរដ្ឋព្រួតគ្នាចាប់បាន។
បច្ចុប្បន្នចោរឆក់ទាំងពីរនាក់ខាងលើនេះ ត្រូវសមត្ថកិច្ចនគរបាលខណ្ឌដូនពេញ ចាប់ឃុំខ្លួនបណ្ដោះអាសន្ន ដើម្បីកសាងសំណុំរឿងបញ្ជូនទៅតុលាការដោះស្រាយតាមនីតិវិធីច្បាប់៕
