ក្រុមឧទ្ទាមអ៊ីស្លាមថៃគំរាមដកខ្លួនចេញពីកិច្ចចរចាសន្តិភាពជាមួយរដ្ឋាភិបាល
ក្រុមឧទ្ទាម អ៊ីស្លាម នៅខេត្តប៉ែកខាងត្បូងប្រទេសថៃបានគំរាមដកខ្លួនចេញពីកិច្ចចរចា សន្តិភាព ជាមួយរដ្ឋាភិបាលក្រុងបាងកក ដោយបានចោទរដ្ឋាភិបាលថាមិនបានបំពេញទៅតាមលក្ខខណ្ឌដែលពួកគេទាម ទារ។ ការគំរាមដកខ្លួនពីតុចរចានេះត្រូវបានធ្វើឡើង នៅក្នុងពេលដែលអំពើហិង្សា នៅប៉ែកខាងត្បូងប្រទេសថៃ កំពុងតែកើតឡើងខ្លាំង។
នៅ ក្នុងវីដេអូចុះផ្សាយនៅលើវិបសៃត៍ Youtube ឧទ្ទាមអ៊ីស្លាម៣រូបបានប្រកាសថា ក្រុមឧទ្ទាម Barisan (Barisan Revolusi Nasional) អាចនឹងដកខ្លួនចេញពីកិច្ចចរចាសន្តិភាពជាមួយរដ្ឋាភិបាល ដោយចោទអាជ្ញាធរក្រុងបាងកកថា បាននិយាយភុតកុហក និងបានប្រើអំពើហិង្សាទៅលើប្រជាជននៅប៉ាថានី។
ប៉ាថានី គឺជាខេត្តមួយ ក្នុងចំណោមខេត្តទាំង៣ នៅប៉ែកខាងត្បូងប្រទេសថៃ ដែលប្រឈមមុខនឹងអំពើបះបោររបស់ក្រុមអ៊ីស្លាមទាមទារផ្តាច់ទឹកដី។ អំពើបះបោរ ដែលបានសម្លាប់មនុស្សប្រមាណជា ៥ ៧០០នាក់ ចាប់តាំងពីឆ្នាំ២០០៤មក។
កាលពីពេលថ្មីៗនេះ រដ្ឋាភិបាលក្រុងបាងកក និងក្រុមឧទ្ទាមអ៊ីស្លាម ដោយរួមមានទាំងក្រុមឧទ្ទាម Barisan ផងដែរនោះ បានយល់ព្រមបើកកិច្ចចរចាសន្តិភាព ហើយកិច្ចចរចានេះ ក៏ធ្លាប់បានបើកធ្វើជាច្រើនដងរួចមកហើយដែរ នៅក្នុងប្រទេសម៉ាឡេស៊ី។ បទឈប់បាញ់មួយក៏ត្រូវបានព្រមព្រៀងគ្នា រវាងរដ្ឋាភិបាលថៃ និងក្រុមឧទ្ទាម ដោយបទឈប់បាញ់នេះត្រូវមានសុពលភាព ពីថ្ងៃទី១០ កក្កដា ដល់ ១៨សីហា ពោលគឺ ក្នុងអំឡុងរដូវបួសនៃអ៊ីស្លាម (Ramadan)។ ក៏ប៉ុន្តែ បទឈប់បាញ់នេះមានប្រសិទ្ធិភាពបានតែប៉ុន្មានថ្ងៃប៉ុណ្ណោះ ដោយក្រុមឧទ្ទាមបានចាប់ផ្តើមបើកការវាយប្រហារឡើងវិញ ដោយគិតជាសរុបបណ្តាលឲ្យមនុស្សស្លាប់ ២៩នាក់ ក្នុងអំឡុងរដូវបួសអ៊ីស្លាមនេះ។
នៅក្នុងវីដេអូ ក្រុមឧទ្ទាមបានចោទអាជ្ញាធរថៃថាមិនបានគោរពទៅតាមលក្ខខណ្ឌនៃ កិច្ចចរចា ក៏ប៉ុន្តែ ពួកគេមិនបានបញ្ជាក់លម្អិតថា តើលក្ខខណ្ឌទាំងនោះជាអ្វីខ្លះទេ។ ក៏ប៉ុន្តែ មន្រ្តីរដ្ឋាភិបាលថៃដែលបានចូលរួមក្នុងការចរចាជាមួយក្រុមឧទ្ទាមបាន ឲ្យដឹងថា ក្រុមឧទ្ទាម Barisan ធ្លាប់បានទាមទារឲ្យរដ្ឋាភិ បាលថៃដោះលែងក្រុមឧទ្ទាមដែលកំពុងជាប់ ឃុំ និងទទួលស្គាល់ពួកគេថាជាចលនារំដោះទឹកដី។
ទោះជាយ៉ាងណា អាជ្ញាធរថៃបានអះអាងថា គេមិនគួរផ្តល់សារៈសំខាន់ខ្លាំងពេកទេ ចំពោះការគំរាមរបស់ឧទ្ទាមទាំង៣រូបតាមវីដេអូ ដែលចុះផ្សាយតាមអ៊ីនធ័រនែតនេះ។ ឧត្តមសេនីយ៍ នីផាត ថុងឡេក (Nipat Thonglek) ដែលជាប្រមុខដឹកនាំចរចា ខាងភាគីរដ្ឋាភិបាលថៃ បានប្រាប់ទីភ្នាក់ងារព័ត៌មានបារាំង AFP កាលពីថ្ងៃព្រហស្បតិ៍ថា ក្រុមឧទ្ទាមដែលនៅក្នុងខ្សែវីដេអូនេះ ទំនងជាស្ថិតក្នុងក្រុមឧទ្ទាម Barisan ដែរ ក៏ប៉ុន្តែ ជាក្រុមដែលជំទាស់មិនចង់ឲ្យ Barisan ចរចាជាមួយរដ្ឋាភិបាល។
បើពិតដូចការអះអាងរបស់ឧត្តមសេនីយ៍ថៃនេះមែន ការចរចារវាងរដ្ឋាភិបាលក្រុងបាងកក និងក្រុមឧទ្ទាម Barisan អាចនឹងបន្តធ្វើ ក៏ប៉ុន្តែ អំពើហិង្សានៅប៉ែកខាងត្បូងក៏ប្រហែលជានឹងត្រូវបន្តកើតមានដែរ គឺអំពើហិង្សា ដែលបង្កឡើងដោយក្រុមឧទ្ទាម ដែលជំទាស់នឹងការចរចានេះ៕ដោយ សេង ឌីណា (RFI)
