តុលាការថៃ៖ ជនរងគ្រោះស្លាប់ដោយគ្រាប់កាំភ្លើងរបស់ទាហាន
តុលាការថៃ បានប្រកាសកាលពីល្ងាចថ្ងៃអង្គារទី ៦ សីហាថា ប្រជាជន៦នាក់ ដែលនៅក្នុងនោះមានគិលានុបដ្ឋាយិការម្នាក់ផង បានស្លាប់ដោយសារគ្រាប់កាំភ្លើងរបស់ទាហានថៃ និងកងរក្សាសន្តិសុខ នៅក្នុងអំឡុងបាតុកម្មតវ៉ាដ៏ហិង្សា របស់ក្រុមអាវក្រហម កាលពីឆ្នាំ ២០១០។ ទាហានថៃបានធ្វើទៅតាមបញ្ជារបស់រដ្ឋាភិបាល ដែលកាលណោះដឹកនាំដោយលោកនាយករដ្ឋមន្រ្តីអាភីស៊ីត វីចាជីវ៉ា។
តុលាការរបស់អ្នកឈ្នះ កាត់ក្តីលើអ្នកចាញ់ ព្រោះតុលាការដែលកាត់ក្តី នៅថ្ងៃអង្គារស្ថិតនៅ ក្រោមរដ្ឋាភិបាលរបស់លោកស្រី យីងឡាក់ ស៊ីណាវ៉ាតដែលបានឈ្នះឆ្នោតលើគណបក្សរបស់លោកអាភីស៊ីត វីចាជីវ៉ា។
កាលពីថ្ងៃអង្គារ តុលាការបានបញ្ជាក់ថា ជនរងគ្រោះត្រូវបានគេសម្លាប់ នៅក្នុងវត្តប៉ាធុំ វ៉ាណារ៉ាម ដែលតាមពិតទៅ ត្រូវជាកន្លែង ស្ងប់សុខ មិនត្រូវរងអំពើហិង្សាអ្វីទាំងអស់។ ដោយផ្អែកលើកោសល្យវិច័យ និងភស្តុតាង ដូចជាគ្រាប់កាំភ្លើង តុលាការរកឃើញថា គឺពួកទាហានដែលបានប្រើកាំភ្លើងយន្ត បាញ់រហ័ស និងឈរពីលើស្ពានអាកាស បាញ់សំដៅ តម្រង់ក្រុមបាតុករអាវក្រហមដែលបានរត់លាក់ខ្លួន ពីការវាយប្រហាររបស់ទាហានថៃ នៅក្នុងបាតុកម្មហិង្សា ឆ្នាំ ២០១០។ ក្នុងចំណោមជនរងគ្រោះ ទាំង៦នាក់ មានម្នាក់ជាគិលានុបដ្ឋាយិកា ដែលបានជួយព្យាបាលក្រុមបាតុកររបួសនៅក្នុងវត្ត ប៉ាធុំ វ៉ាណារ៉ាម។
ជារួម តុលាការប្រកាសថា ទាហានទាំងនោះ រួមជាមួយកងរក្សាសន្តិសុខបានធ្វើតាមបញ្ជារបស់រដ្ឋាភិបាល។ រដ្ឋាភិបាល ជាពិសេសលោកអាភីស៊ីតដែលជានាយករដ្ឋមន្រ្តី ក្នុងអាណត្តិ នោះ បានរងការចោទប្រកាន់ថា បានប្រព្រឹត្តឃាតកម្មទៅលើប្រជាជន។ ចំណែក មេដឹកនាំយោធាដែលចូលរួមក្នុងការបង្រ្កាបទៅលើក្រុមបាតុករ រហូតមកដល់ពេលនេះ នៅតែរួចខ្លួន រួចផុតពីការចោទប្រកាន់ និងការចាប់ដាក់ឃុំ។ នៅឆ្នាំ ២០១០ ការប្រឈមមុខដាក់គ្នា ដ៏ហិង្សា រវាងទាហានថៃ និងក្រុមអាវក្រហម ដែលគាំទ្រលោកថាក់ស៊ីន បានធ្វើឲ្យមនុស្សជាង ៩០នាក់បាត់បង់ជីវិត ក្នុងពេលដែលមនុស្សជិត១៩០០នាក់រងរបួស។
សេចក្តីប្រកាសរបស់តុលាការថៃ នៅថ្ងៃអង្គារ ធ្វើឡើង នៅក្នុងបរិយាកាសដែលនយោបាយថៃអាចជួបភាពវឹកវរជាថ្មី។ នោះ គឺនៅថ្ងៃពុធនេះ ក្រុមអាវលឿង ដែលជាក្រុមគាំទ្រកងទ័ព និងរាជវង្សថៃ និងដែលប្រឆាំងរដ្ឋាភិបាលថៃបច្ចុប្បន្ន គ្រោងនឹងលើកគ្នាទៅតវ៉ា នៅមុខរដ្ឋសភា ដើម្បីប្រឆាំងនឹងច្បាប់ដែលសភាគ្រោងនឹងលើកយកទៅពិភាក្សា នៅថ្ងៃពុធទី ៧ សីហា។
ច្បាប់នេះ ទំនងអាចទម្លាក់ចោលរាល់ការចោទប្រកាន់ទៅលើអ្នកនយោបាយ ទាំងឡាយណា ដែលចូលរួមពាក់ព័ន្ធក្នុងអំពើហិង្សា ដែលកើតមានចាប់តាំងពីខែ កញ្ញាឆ្នាំ ២០០៦ ដែលមានរដ្ឋប្រហារទម្លាក់លោកថាក់ស៊ីន រហូតដល់ឆ្នាំ ២០១២។ ក្រុមអាវលឿងប្រឆាំងនឹងច្បាប់ដ៏ចម្រូងចម្រាសនេះ ព្រោះពួកគេគិតថា លោកស្រីយីងឡាក់ នាយករដ្ឋមន្រ្តីថៃ បច្ចុប្បន្នកំពុងយកលេសបង្កើតច្បាប់នេះ ដើម្បីធ្វើឲ្យបងប្រុសរបស់លោកស្រី គឺលោកថាក់ស៊ីនរួចផុតពីការចោទ ប្រកាន់ និងអាចវិលត្រលប់ចូលស្រុកវិញបាន ដោយគ្មានទោសពៃអ្វីទាំងអស់៕ដោយ ឈាង បុប្ផា(RFI)