ផឹកស៊ីឌឺដងគ្នា បាញ់ត្រូវភ្លែកធ្លាយមកក្រោយ
ភ្នំពេញ៖ កាលពីវេលាម៉ោង១១ និង៣០នាទី យប់ថ្ងៃទី០៦ ខែសីហា នៅចំណុចផ្លូវលេខ២១៥ កែង និងផ្លូវលេខ២១២ ក្នុងសង្កាត់ផ្សារដេប៉ូទី៣ ខណ្ឌទួលគោក បុរសម្នាក់ក្នុងចំណោម៤នាក់ត្រូវគ្រាប់កាំភ្លើងត្រង់ភ្នែកខាងស្ដាំ ធ្លាយមកក្បាលខាងក្រោយដេកដួលក្នុងថ្លុកឈាម ខណៈដែលអង្គុយផឹកស៊ីនៅក្នុងហាងមួយ ហើយប្រើប្រាសភាសារឌឺដង ទៅក្រុមម្ខាងទៀត ។
ជនរងគ្រោះដែលត្រូវគ្រាប់កាំភ្លើងមានឈ្មោះ សុខ សេងធិន អាយុ២៣ ឆ្នាំ មុខរបរជាយោធា បច្ចុប្បន្នជាសិក្ខាកាមនៅសាលាបណ្ដុះបណ្ដាល នាយទាហានពេជ្រនិល ក្នុងកងពលតូចលេខ៤១ និង មានស្រុកកំណើតនៅភូមិ ស្រះស្ដារ ឃុំសន្តិភាព ស្រុកសំពៅលូន ខេត្តបាត់ដំបង ។
តាមសម្ដីសាក្សីឈ្មោះ ឈន សំអូន អាយុ២៩ឆ្នាំ ដែលត្រូវជាបងថ្លៃជនរងគ្រោះបានឲ្យដឹងថា ពេលកើតហេតុ ពួកគាត់ដែលមានគ្នា៤នាក់ បានអង្គុយនៅនឹងតុ ចំណែកជនបង្កមានគ្នា ៥-៦នាក់ មិនដឹងជាទាហានឬ នគរបាល អង្គុយជាប់គ្នាខាងក្រោយ ។ ពេលនោះ ជនបង្កបានចូលបន្ទប់ទឹកពេលចេញមកវិញ ជនរងគ្រោះបានដាក់កៅអីរាំងផ្លូវធ្វើឲ្យទើស ពេលនោះជនបង្ក បានដើរវាងទៅអង្គុយតុរបស់ខ្លួនវិញ ហើយក៏បានមើលមុខគ្នាទៅវិញទៅមក រួចក៏ឈានទៅដល់ការវាតតប់គ្នាប្រាវតែម្តង ។ គ្រានោះជនបង្កបានដកកាំភ្លើងបាញ់ទៅលើជនរងគ្រោះ ត្រូវភ្នែកស្ដាំធ្លាយមកក្រោយ បណ្ដាលឲ្យដេកដួលក្នុងថ្លុកឈាម រួចនាំគ្នាគេចបាត់ ។
ភ្លាមៗត្រូវបានរថយន្តសាមុយទៅដឹកយកទៅមន្ទីរពេទ្យ កាលម៉ែត ។ ប៉ុន្តែរហូតដល់ម៉ោង២ និង៣០នាទី ជនរងគ្រោះខាងលើត្រូវបានបងប្អូន ហៅរថយន្តឈ្នួលដឹកយកទៅស្រុកកំណើត ដោយសារតែបានចម្លើយពីពេទ្យថា គ្មានសង្ឃឹមព្រោះរបួសធ្ងន់ធ្ងរ ៕ Cambodia News
