គណបក្សសង្គ្រោះជាតិធ្វើការពិនិត្យឈ្មោះអ្នកគាំទ្រដែលបាត់
ភ្នំពេញ៖ នៅថ្ងៃទី០១ ខែសីហានេះ គណកម្មាធិការគណបក្សសង្គ្រោះជាតិ នៅទីស្នាក់ការកណ្ដាល សង្កាត់ភ្នំពេញេ ខណ្ឌទួលគោក បានឲ្យដឹងថា គណបក្សសង្គ្រោះជាតិក៏កំពុងធ្វើការពិនិត្យឈ្មោះរបស់អ្នកគាំទ្រ ខ្លួនដែលគណបក្សនេះអះអាងថាបានបាត់ឈ្មោះ តែចំនួនប្រជាពលរដ្ឋ ដែលបានបាត់ឈ្មោះនោះ គណបក្សសង្គ្រោះជាតិបានរកឃើញត្រឹមតែជាង១ពាន់ប៉ុណ្ណោះ។
នៅខណៈដែល គ.ជ.ប កំពុងតែធ្វើការរាប់សន្លឹកឆ្នោត ហើយមិនទាន់បានបែកចែកអាសនៈនៅឡើយនោះ ប៉ុន្តែមេដឹកនាំគណបក្សប្រឆាំង លោក សម រង្ស៊ី និងលោក កឹម សុខា បានធ្វើសន្និសីទកាសែតភ្លាមៗបដិសេធលទ្ធផលឆ្នោតនៅថ្ងៃទី២៩ ខែកក្កដា ឆ្នាំ២០១៣ នៅទីស្នាក់ការកណ្ដាលរបស់ខ្លួន ដោយបានស្នើអោយមានការបង្កើតគណកម្មាធិការជម្រុះមួយ ក្នុងនោះមានភាគីពាក់ព័ន្ធចូលរួមពីតំណាងអង្គការសហប្រជាជាតិ គណកម្មាធិការជាតិរៀបចំការបោះឆ្នោត គណបក្សប្រជាជនកម្ពុជា គណបក្សសង្គ្រោះជាតិ អង្គការសមាគមជាតិ និងអន្តរជាតិផងដែរ។
ទាក់ទងនឹងការបង្កើតគណកម្មធិការជម្រុះដើម្បីធ្វើការពិនិត្យ សន្លឹកឆ្នោតរួមនោះ លោកនាយករដ្ឋមន្ត្រី ហ៊ុន សែន កាលពីថ្ងៃទី៣១ ខែកក្កដា ម្សិលមិញ នៅការដ្ឋានស្ពានអាកាសស្ទឹងមានជ័យ បានយល់ព្រមអោយមានការបង្កើតក្រុមការងារក្នុងការរាប់ សន្លឹកឆ្នោតនេះ ដោយមានសមាសភាព មកពីគណបក្សប្រជាជនកម្ពុជាចូលរួមដូចជាលោកឧបនាយករដ្ឋមន្ត្រីស ខេង លោកឧបនាយករដ្ឋមន្ត្រី សុខ អាន និងលោក សាយ ឈុំ៕ Cambodia News
