ប្រជាពលរដ្ឋខេត្តព្រះវិហារព្រួយបារម្ភពីការរីករាលដាលជំងឺឈីកឆ្លងតាមមូសខ្លាខាំ
គិតចាប់តាំងពី ខែមិនាដល់ ឧសភា២០១២ នេះជំងឺឈីកគុណហ្គុនយ៉ា(chikungunya) ដែលឆ្លងតាមរយៈសត្វមូសខ្លាខាំបានកើតរីករាលដាលពីភូមិមួយទៅភូមិមួយ ពីស្រុកមួយទៅស្រុកមួយទៀតនៅទូទាំងខេត្តព្រះវិហាររហូតនៅមិនទាន់បានធូរស្រាលនៅឡើយទេ ដោយសារអ្នកជំងឺទាំងចាស់ទាំងក្មេងជាច្រើនរយនាក់បានសំរុក ទៅទិញថ្នាំនិងព្យាបាលនៅពេទ្យឯកជន។
ក្រុមគ្រូពេទ្យបានប្រាប់ប្រាប់ឲ្យដឹងថា ជំងឺឈីកនេះទើបតែកើតមានជាលើកដំបូងនៅឆ្នាំនេះចំលងមេរោគតាមរយៈ មូសខ្លាខាំដោយដឹងថាជំងឺនេះបានវាយលុកដំបូងគេនៅក្នុងស្រុកជាំ ក្សាន្ដចំណែកវិធីការពារត្រូវដេកដាក់មុងជាប្រចាំ។
ប្រជាពលរដ្ឋជាអ្នកជំងឺទាំងនៅ មន្ទីរពេទ្យរដ្ឋនិងឯកជនបាននិយាយថា ជំងឺឈីកនេះស្រដៀង គ្នានិងជំងឺអុតក្ដាមមានអាការៈក្ដៅខ្លួនព្រឺរងាឈឺសន្លាក់ដៃជើង ពឺតឆ្អឹងខ្នងរមាស់សព្វខ្លួនហេវហត់អស់កំលាំងនិងល្វីងមាត់ពិបាក ស៊ូទ្រាំខ្លាំងណាស់ក្នុងមួយគ្រួសារកើតឆ្លងគ្នាពីម្នាក់ទៅ ម្នាក់ទៀត៕
