ថៃប្រកាសពន្យាពេលបោះឆ្នោតជាថ្មី ដោយសារផ្ទុះចលាចល
សារព័ត៌មាន Cambodia News/
ថៃ (១៦ ឧសភា ២០១៤) ៖ នៅមិនទាន់បានបញ្ចប់នៅឡើយទេ ពីភាពចលាចលនៅក្នុងប្រទេសថៃ ដែលបានកើតឡើងជាបន្ដបន្ទាប់ បើទោះបីជាលោកស្រី យីងឡាក់ ស៊ីណាវ៉ាត្រា ត្រូវបានទម្លាក់ចេញពីតំណែងក៏ដោយ។
បន្ទាប់ពីការវាយប្រហារបានកើតឡើងហើយ ក្រុមបាតុករប្រឆាំងរដ្ឋាភិបាល ក៏បាននាំគ្នាទៅបំបែកកិច្ចប្រជុំរវាងរដ្ឋាភិបាល និងមន្ដ្រី គ.ជ.ប ដោយបង្ខំឱ្យនាយករដ្ឋមន្ដ្រីចាំផ្ទះទើបតែតែងតាំងលោក នីវ៉ាត់ទុមរ៉ុង ប៊ុនសុងផៃសាន និងមន្ដ្រី គ.ជ.ប ចាកចេញពីអង្គប្រជុំ។
ភាពតានតឹង នៅតែកើតឡើងជាបន្ដបន្ទាប់ដូច្នេះ នៅថ្ងៃទី១៥ខែឧសភាដដែល គ.ជ.បថៃ បានសម្រេចប្រកាសជាផ្លូវការពន្យាពេលការបោះឆ្នោតសភា ដែលនឹងប្រព្រឹត្ដិទៅនៅថ្ងៃទី២០កក្កដាខាងមុខនេះ។
ដោយឡែកលោក ប៊ុនសុងផៃសាន បានលើកឡើងដែរថា នៅដើមខែសីហាអាចជាពេលវេលាល្អសម្រាប់ការបោះឆ្នោត ស្របពេលដែលមន្ដ្រីគ.ជ.ប បានបញ្ជាក់ថា ប្រសិនបើក្រុមបាតុករនៅតែប្រឆាំង ការបោះឆ្នោតពិតជាមិនអាចប្រព្រឹត្ដិទៅបានឡើយ។
គួរបញ្ជាក់ដែរថា កាលពីថ្ងៃទី១៥ខែឧសភា មានការវាយប្រហារទៅលើទីតាំង ដែលក្រុមបាតុករប្រឆាំងរដ្ឋាភិបាលស្ថិតនៅ ក្នុងរាជធានីនៃប្រទេសថៃ តាមរយៈការបំផ្ទុះគ្រាប់បែក ក៏ដូចជាការបាញ់ កាំភ្លើង ដោយបណ្ដាលឱ្យមានមនុស្ស៣នាក់ស្លាប់ និងជាង២០នាក់ផ្សេងទៀតរងរបួស៕
