បេក្ខជនប្រឡងឆ្នាំនេះមានចំនួន៩៣៧៥២នាក់ ចែកចេញជា១៥៧មណ្ឌល
សារព័ត៌មាន Cambodia News/
ភ្នំពេញ (០៤ សីហា ២០១៦) ៖ ថ្លែងនៅក្នុងសន្និសិទ្ធសារព័ត៌មាននាទីស្តីការក្រសួង អប់រំ កាលពីថ្ងៃទី៣ ខែសីហា លោក ហង់ ជួនណារ៉ុន រដ្ឋមន្ត្រីក្រសួង អប់រំ យុវជន និងកីឡា បានឲ្យដឹងថា ក្នុងឆ្នាំ២០១៦នេះ មានសិស្សចូលរួមប្រឡងជាង៩ម៉ឺននាក់ ហើយក្នុងដំណើរប្រឡងបាក់ឌុបនេះ ក្រសួងអប់រំបានដាក់បុគ្គលិកធ្វើការត្រួតពិនិត្យជាច្រើនម៉ឺននាក់ ក្នុងនោះសម្រាប់ដំណើរការសំណេរ មានចំនួនជិត១៣.០០០នាក់ និងក្នុងដំណើរការកំណែមានចំនួន១១.៥០០នាក់ រាប់ទាំងប្រធានមណ្ឌល គណៈមេប្រយោគ អនុរក្ស អ្នកត្រួតពិនិត្យផងដែរ។
លោក ហង់ ជួនណារ៉ុន បានបន្តថា ការប្រឡងបាក់ឌុបនៅឆ្នាំនេះនឹងត្រូវរឹតបន្តឹង គ្រប់តំណាក់កាលសំដៅធ្វើយ៉ាងណាឱ្យការប្រឡងប្រកបដោយតម្លាភាពនិងសុ ក្រិត្យភាពដែលអាចទទួលយកបានទាំងបេក្ខជនក៏ដូចជាឪពុកម្តាយរបស់សិស្ស ។
លោករដ្ឋមន្ត្រី បន្តថា នៅទូទៅប្រទេសកម្ពុជា មណ្ឌលដែលត្រូវដាក់ឱ្យដំណើរការប្រឡងនេះ នឹងចាប់ផ្តើម នៅថ្ងៃទី២២ ខែសីហា ឆ្នាំ២០១៦ មានចំនួន១៥៥មណ្ឌល ហើយឈ្មោះបេក្ខជនប្រឡង មានចំនួន៩៣.៧០០នាក់ ក្នុងនោះមានសិស្សប្រឡងស្វ័យរិនចំនួន២៥ភាគរយប្រហែល២៥.០០០នាក់។
លោក ហង់ ជួនណារ៉ុន បានបញ្ជាក់ថា ដំណើរការប្រឡងនេះ ក្រសួងអប់រំបានសហការជាមួយអង្គភាពប្រឆាំងអំពើពុករលួយ (ACU) ដាក់ឱ្យមានអ្នកត្រួតពិនិត្យ អ្នកសង្កេតការណ៍ ពី១០-២០នាក់ក្នុងមួយមណ្ឌល និងបានសហការជាមួយក្រសួងមហាផ្ទៃដាក់ឱ្យមានកងកម្លាំងនគរបាល ដើម្បីការពារសណ្ដាប់ធ្នាប់ពី៥-១០នាក់ ទៅតាមមណ្ឌលតូច ឬក៏មណ្ឌលធំ៕ ដោយ ៖ ហេង នាង
