កម្ពុជាមានអត្រាអ្នកស្រូបផ្សែងបារីពីអ្នកជក់រហូតដល់៧៦ភាគរយ
សារព័ត៌មាន Cambodia News/
សុខភាព (២៩ តុលា ២០១៥) ៖ ទីភា្នក់ងារសារព័ត៌មានកម្ពុជាបានឱ្យដឹងថា តាមការសិក្សាស្រាវជ្រាវទៅលើការប្រើប្រាស់ថ្នាំជក់បានបង្ហាញថា អត្រានៃការស្រូបផ្សែងបារីពីគេ នៅតែមានកម្រិតខ្ពស់នៅឡើយ ពោលគឺ៧៦ភាគរយនៅតាមភោជនីយដ្ឋាន, ៤៩ភាគរយនៅតាមអគាររបស់រដ្ឋ, ៣៣,៦ភាគរយនៅតាមទីសាធារណៈ, និង២១,៦ ភាគរយនៅតាមគ្រឹះស្ថានសុខាភិបាល។
ដោយឡែក មានតែ៤ភាគរយ នៃអ្នកជក់បារីប៉ុណ្ណោះ ដែលមានបំណងលះបង់ទម្លាប់ជក់បារី ក្នុងកំឡុងពេល១២ខែកន្លងមក។ នេះបើតាមការឱ្យដឹងនៅក្នុងសិក្ខាសាលា ផ្សព្វផ្សាយលទ្ធផលនៃការស្រាវជ្រាវថ្នាក់ជាតិ ស្តីពីការប្រើប្រាស់ថ្នាំជក់ក្នុង ចំណោមមនុស្សពេញវ័យនៅកម្ពុជាឆ្នាំ២០១៤ ដែលបានប្រព្រឹត្តនៅថ្ងៃទី២៨ ខែតុលា នៅសណ្ឋាគារសាន់វ៉េ រាជធានីភ្នំពេញ។
ប្រភដដែលបានបន្តថា ចំនួនពិតប្រាកដនៃអ្នកជក់បារីជាបុរសបានកើនឡើងពី១,៣៤លាននាក់ កាលពីឆ្នាំ២០១១ ទៅ១,៥៥លាននាក់នៅឆ្នាំ២០១៤។ ដោយឡែក អត្រាអ្នកជក់បារីបច្ចុប្បន្នក្នុងចំណោមបុរស ដែលមានអាយុពី១៥ឆ្នាំឡើងទៅបានថយចុះពី ៣៩ភាគរយ នៅឆ្នាំ២០១១ មក ៣៣ភាគរយនៅឆ្នាំ២០១៤។ ប៉ុន្តែអត្រាជក់បារីក្នុងចំណោមបុរសវ័យចំណាស់អាយុចាប់ពី ៤៥ ដល់៦៤ឆ្នាំ មានកម្រិតខ្ពស់គឺ ៤៨,៧ភាគរយ៕
