ក្រសួងការងារអនុញ្ញាតឲ្យកម្មករឈប់ ៣ថ្ងៃដើម្បីទៅបោះឆ្នោត
Cambodia News/
ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ បានអនុញ្ញាតច្បាប់ជូននិយោជិត កម្មករកម្មការិនី បំរើការងារនៅតាមរោងចក្រ សហគ្រាស និងគ្រឹះស្ថាននានា នៅទូទាំងប្រទេស ឈប់សម្រាកចំនួន ៣ថ្ងៃចាប់ពីថ្ងៃទី២៧-ដល់២៩ ខែកក្កដា ឆ្នាំ២០១៣ ដើម្បីទៅចូលរួមបោះឆ្នោតជ្រើសតាំងតំណាងរាស្ត្រនីតិកាលទី៥។
នៅថ្ងៃទី១៧ ខែកក្កដា នេះ លោក ជា មុនី ប្រធានសហជីពសេរីកម្មករ បានស្នើឲ្យកម្មករកម្មការិនី ទៅបោះឆ្នោត ដើម្បីជ្រើសរើសមេដឹកនាំប្រទេស ឲ្យបានត្រឹមត្រូវ តាមឆន្ទៈរៀងៗខ្លួន និងមិនត្រូវភ័យខ្លាចនោះទេ។
លោក ជា មុនី ក៏បានអំពាវនាវ ដល់អ្នកប្រកបរបរសេវាដឹកជញ្ជូនតាម រថយន្តក្រុង ឬរថយន្តឈ្នួលដទៃទៀត ស្នើកុំតម្លើងថ្លៃធ្វើដំណើរ ដើម្បីផ្តល់ឱកាសឲ្យប្រជាពលរដ្ឋ ឬកម្មករកម្មការិនី ទៅបោះឆ្នោតបានគ្រប់ៗគ្នា។
ដូចគ្នានេះដែរ លោក រ៉ុង ឈុន ប្រធានសហភាពសហជីពកម្ពុជា និងជាប្រធានសមាគមគ្រូបង្រៀនកម្ពុជាឯករាជ្យ ក៏បានស្នើដល់ក្រសួងការងារ ឲ្យជួយអន្តរាគន៍ទៅថៅកែរោងចក្រ សហគ្រាសនានា ឲ្យបើកប្រាក់បៀវត្សរ៍ជូនកម្មករកម្មការិនី ដើម្បីពួកគេមានថវិកា ដើម្បីចំណាយថ្លៃធ្វើដំណើរទៅ ចូលរួមបោះឆ្នោតនៅតាមស្រុកកំណើត៕