ចាប់បញ្ជូនជនបង្ករបួសស្នាម លើសមាជិកគណបក្សប្រជាជនទៅតុលាការខេត្តកណ្តាល
Cambodia News/
ភ្នំពេញ៖ ជនសង្ស័យម្នាក់ ដែលបានបង្ករបួសស្នាម លើសមាជិកគណបក្សប្រជាជនកម្ពុជា បណ្តាលឲ្យរបួសធ្ងន់ ស្រាលបីនាក់ ត្រូវបានសមត្ថកិច្ចឃាត់ខ្លួន និងបានបញ្ជូនខ្លួន ទៅកាន់តុលាការខេត្តកណ្តាល នៅព្រឹកថ្ងៃទី១៧ ខែកក្កដា នេះ។
ហេតុការណ៍បង្ករបួសស្នាម ជាលក្ខណៈហិង្សានេះ កើតមានឡើងនៅម៉ោង ១១និង៤០នាទីព្រឹក ថ្ងៃទី១៥ ខែកក្កដា ឆ្នាំ២០១៣ នៅលើស្ពានថ្ម ក្នុងភូមិបឹងក្តុល ឃុំកំពង់អុស ស្រុកពញាឮ ខេត្តកណ្តាល ដោយគណបក្សសង្គ្រោះជាតិ ដែលដឹកនាំដោយលោក អេង ឆៃអ៊ាង និងលោក អ៊ូ ច័ន្ទឫទ្ធិ បានប្រើសមាជិក សមាជិការបស់ខ្លួន យករថយន្តទៅដាក់លើស្ពាន (ទៅមកបាន តែរថយន្តមួយគ្រឿង) រួចហើយ បើកទ្វារទាំងសងខាងក្នុង បំណងរារាំងមិនឲ្យក្បួនហែរបស់គណបក្សប្រជាជនកម្ពុជា ដែលមកតាមក្រោយឆ្លងកាត់ស្ពាននេះបាន។
លោក ចាន់ យុត្ថា បានឲ្យដឹងទៀតថា នៅពេលឃើញគេដាក់រថយន្តបិទផ្លូវលើស្ពាន ក្បួនហែដោយម៉ូតូរបស់គណបក្សប្រជាជនកម្ពុជាមួយចំនួន ក៏បានជិះចុះក្រោមស្ពាន (មិនទាន់មានទឹក) ដើម្បីទៅសួរនាំអ្នក ដែលបានបិទផ្លូវ ហើយក៏ត្រូវបានពួកគេ (សមាជិកគណបក្សសង្គ្រោះជាតិ) ព្រួតគ្នាវាយតប់រហូតបែកក្បាលម្នាក់ និងពីរនាក់ទៀត របួសស្រាល។ នៅពេលមានហេតុការណ៍កើតឡើង អ្នកបញ្ជាក្បួនហែរបស់គណបក្សសង្គ្រោះជាតិ បានដកថយអស់ នៅសល់តែសមាជិក ដែលមិនដឹងអី។
ពាក់ព័ន្ធនឹងករណីនេះ លោក ចាន់ យុត្ថា អនុប្រធានគណៈពង្រឹងមូលដ្ឋានគណបក្សប្រជាជនកម្ពុជា ស្រុកពញាឮ ខេត្តកណ្តាល បាននិយាយឲ្យដឹងនៅថ្ងៃទី១៦ខែកក្កដា ថា ការបិទផ្លូវ មិនឲ្យក្បួនដង្ហែឃោសនារបស់គណបក្សប្រជាជនកម្ពុជា ឆ្លងកាត់ និងបង្កឲ្យមានរបួសស្នាមដល់សមាជិករបស់គណបក្សប្រជាជនកម្ពុជា ស្រុកពញាឮ ចំនួនបីនាក់ ដោយគណបក្សសង្គ្រោះជាតិ កាលពីថ្ងៃទី១៥ ខែកក្កដា ឆ្នាំ២០១៣ ត្រូវបានប្តឹងទៅគណៈកម្មការរៀបចំការបោះឆ្នោតឃុំកំពង់អុស និងសមត្ថកិច្ចពាក់ព័ន្ធរួចហើយ៕