ប្រធានាធិបតី ថេន សេន សន្យាដោះលែងអ្នកទោសនយោបាយទាំងអស់
ក្នុងពេលបំពេញទស្សនកិច្ចនៅប្រទេស អង់គ្លេស ប្រធានាធិបតីភូមា លោក ថេន សេន បានប្រកាសថា លោកនឹងដោះលែងអ្នកទោសនយោបាយទាំងអស់ចាប់ពីពេលនេះរហូតដល់ដំណាច់ ឆ្នាំ។ ប្រធានាធិបតីភូមាក៏បានសន្យាផងដែរថា បទឈប់បាញ់គ្នាជាមួយក្រុមជនជាតិភាគតិចនឹងអាចធ្វើឡើងនៅក្នុង សប្តាហ៍ខាងមុខនេះ។
ចាប់ពីពេល នេះរហូតដល់ដំណាច់ឆ្នាំ ២០១៣ ប្រទេសភូមានឹងគ្មានអ្នកទោសនយោបាយទៀតឡើយ។ នេះគឺជាការសន្យាជាឧឡារឹករបស់ប្រធានាធិបតីភូមា លោក ថេន សេន ដែលកំពុងបំពេញទស្សនកិច្ចនៅក្នុងទីក្រុងឡុងដ៏ប្រទេសអង់គ្លេស។ សម្រាប់លោក ថេន សេន ប្រទេសភូមានឹងមិនគិតអ្វីផ្សេងក្រៅតែពីការប្រែក្លាយប្រទេសដែល គ្រប់គ្រងដោយរបបយោធាផ្តាច់ការអស់រយៈពេលកន្លះសតវត្សរ៍មួយនេះឲ្យ ទៅជាប្រទេសប្រជាធិបតេយ្យវិញនោះឡើយ។
លោក ថេន សេន ក៏បានបង្ហាញសុទិដ្ឋិនិយមផងដែរចំពោះលទ្ធភាពបញ្ចប់ជម្លោះជាច្រើន ទសវត្សរ៍រវាងរដ្ឋាភិបាលជាមួយក្រុមជនជាតិភាគតិច។ ជម្លោះដែលបានកើតឡើងចាប់តាំងពីប្រទេសនេះបានទទួលឯករាជពី អង់គ្លេសកាលពីឆ្នាំ ១៩៤៨ ។ លោកអះអាងថា កិច្ចព្រមព្រៀងឈប់បាញ់ថ្នាក់ជាតិមួយអាចនឹងកើតឡើង ហើយសូរកាំភ្លើងនឹងស្ងប់ស្ងាត់នៅក្នុងប្រទេសនេះជាលើកដំបូងក្នុង រយៈពេល ៦០ ឆ្នាំមកនេះ។
សូមបញ្ជាក់ថា លោក ថេន សេន កំពុងបំពេញទស្សនកិច្ចនៅទីក្រុងឡុងដ៏។ លោកនឹងបន្តដំណើរបំពេញទស្សនកិច្ចនេះទៅកាន់ទីក្រុងប៉ារីសទៀតនៅ ថ្ងៃទី ១៧ និង ១៨ កក្កដាខាងមុខនេះ។ នៅមុនការទៅដល់របស់លោក ថេន សេន អង្គការការពារសិទ្ធិមនុស្សជាច្រើនបានអំពាវនាវកុំឲ្យប្រធានាធិបតី បារាំង លោក François Hollande ស្ថិតនៅស្ងៀមស្ងាត់ឲ្យសោះចំពោះការរំលោភសិទ្ធិមនុស្សនៅក្នុង ប្រទេសភូមា។
នេះជាលើកទី២ហើយដែលលោកបានទៅបំពេញទស្សនកិច្ចនៅទ្វីបអឺរ៉ុប។ កាលពីខែមីនាកន្លងទៅ លោកថេន សេន បានបំពេញទស្សនកិច្ចនៅទ្វីបនេះម្តងរួចទៅហើយដូចជានៅប្រទេស ន័រវេស អូទ្រីស និងប៊ែលហ្សិក។
លោកថេន សេន គឺជាមេដឹកនាំដែលបានបញ្ចប់ភាពឯកោរបស់ប្រទេសភូមាតាមរយៈការធ្វើ សមាហរណ កម្មទៅក្នុងសហគមន៍អន្តរជាតិ និងការអនុញ្ញាតឲ្យមេដឹកនាំបក្សប្រឆាំង លោកស្រី អង់សាន ស៊ូជី ចូលទៅក្នុងឆាកនយោបាយឡើងវិញ និងតាមរយៈការដោះលែងអ្នកទោសនយោបាយ៕ដោយ ប៉ែន បូណា (RFI)