ឪពុកលោក នាយករដ្ឋមន្ត្រីទទួលមរណភាពក្នុងជន្មាយុ ៩០ ឆ្នាំ
Cambodia News/
ភ្នំពេញ៖ អ្នកឧកញ៉ា មហាភក្តីសប្បុរសភោគាធិបតី ហ៊ុន នាង ឪពុកបង្កើតរបស់លោក នាយករដ្ឋមន្ត្រីហ៊ុន សែន បានទទួលមរណភាព នៅព្រឹកថ្ងៃសុក្រ ទី១២ ខែកក្កដា ឆ្នាំ២០១៣ នេះ វេលាម៉ោង ០៤ និង ១០ នាទី ទៀបភ្លឺ ដោយជរាពាធក្នុងជន្មាយុ ៩០ ឆ្នាំ។
យោងតាមកម្មវិធីបុណ្យដែលបានគ្រោងទុកជាបឋមបានឲ្យដឹងថា ពិធីបុណ្យសពចាប់ផ្តើមពីថ្ងៃទី ១២ ខែកក្កដា ឆ្នាំ២០១៣ នេះ រហូតដល់ថ្ងៃពុធ ទី១៧ ខែកក្កដា ឆ្នាំ២០១៣ ខាងមុខ នៅភូមិគ្រឹះ «លោក នាយករដ្ឋមន្ត្រីហ៊ុន សែន» និងលោក ជំទាវ ប៊ុន រ៉ានី ហ៊ុន សែន នៅរាជធានីភ្នំពេញ៕
លោកឧកញ៉ា មហាភក្តី ហ៊ុន នាង មានអាយុ ៩០ ឆ្នាំ កើតនៅថ្ងៃទី២៧ ខែសីហា ឆ្នាំ១៩២៣ នៅភូមិពាមកោះស្នា ឃុំពាមកោះស្នា ស្រុកស្ទឹងត្រង់ ខេត្តកំពង់ចាម។ លោកមានកូនប្រុសស្រីចំនួន ៦ នាក់។ ក្រៅពី មានកូនប្រុសស្រីចំនួន ៦នាក់ លោកមហាឧបាសក ហ៊ុន នាង មានចៅប្រុសស្រីចំនួន ៣០ នាក់ និងចៅទួតប្រុសស្រីចំនួន ៦០ នាក់ បន្ថែមទៀត។
នៅខែកញ្ញា ឆ្នាំ២០១១ លោកឧកញ៉ាមហាឧបាសក ហ៊ុន នាង ត្រូវបានព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានប្រោសព្រះរាជទានគោរមងារ ជាអ្នកឧកញ៉ាមហាភក្តីសប្បុរិសភោគាធិបតីហ៊ុននាង៕