ចោទប្រកាន់ជនសង្ស័យបាញ់សម្លាប់លោក ឈុត វុទ្ធី ពីបទមនុស្សឃាតដោយអចេតនា
បុគ្គលិកអង្គការសិទ្ធិមនុស្ស លីកាដូ ប្រចាំខេត្តកោះកុង លោក អ៊ិន គង់ជិត បានឲ្យដឹងថា ក្រោយពីបានសាកសួរជនសង្ស័យម្នាក់ ឈ្មោះ រ៉ាន់ បូរ័ត្ន សន្តិសុខរបស់ក្រុមហ៊ុន Timber Green ចាប់តាំងពីរសៀលថ្ងៃទី៣ឧសភា និងបន្តរហូតដល់ព្រឹកថ្ងៃទី៤ ឧសភា ២០១២ តំណាងអយ្យការតុលាការខេត្តកោះកុង បានសម្រេចចោទប្រកាន់បុរសនោះ ពីបទមនុស្សឃាត ដោយអចេតនា។
ក្រោយការចោទប្រកាន់ ព្រះរាជអាជ្ញាបានបញ្ជូនសំណុំរឿងបន្ត ទៅកាន់ចៅក្រមស៊ើបអង្កេត មុននឹងសម្រេចថា ត្រូវឃុំខ្លួន ឬយ៉ាងណានោះ។
ការចោទប្រកាន់លើបុរសជាប់សង្ស័យធ្វើឡើងក្រោយពីគណៈកម្មការចម្រុះមួយក្រុម ដឹកនាំដោយលោកឧត្តមសេនីយ៍ ម៉ក់ ជីតូ បានបើកការស៊ើបអង្កេត និងចុះដល់កន្លែងកើតហេតុ នៅតាមផ្លូវក្រួសក្រហម ក្នុងស្រុកមណ្ឌលសីមា ខេត្តកោះកុង កាលពីថ្ងៃទី៣ឧសភា ឆ្នាំ២០១២។
លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័ស របស់ទីស្តីការគណៈរដ្ឋមន្ត្រី និងជាសមាជិកគណៈកម្មការចម្រុះស៊ើបអង្កេតករណីឃាតកម្មនោះ បានឲ្យដឹងនៅព្រឹកថ្ងៃទី៤ឧសភា ឆ្នាំ២០១២ថា ក្រោយពីសាកសួរសាក្សីមួយចំនួន បង្ហាញថា ប៉េអឹមដែលស្លាប់ឈ្មោះ អ៊ិន រតនា បានបាញ់សម្លាប់លោក ឈុត វុទ្ធី ក្រោយពីប៉ះទង្គិចពាក្យសម្តីគ្នា កាលពីរសៀលថ្ងៃទី២៦មេសា ឆ្នាំ២០១២។ ប៉ុន្តែលទ្ធផលលម្អិតនៃការស៊ើបអង្កេតរបស់គណៈកម្មការ មិនត្រូវបានបញ្ចេញឲ្យដឹងទេ។
យ៉ាងណាក៏ដោយ នៅឯតុលាការ ក៏មានការលើកឡើងថា ក្រោយពីប៉េអឹម អ៊ិន រតនា បានបាញ់សម្លាប់លោក ឈុត វុទ្ធី ហើយនោះ ជនសង្ស័យ រ៉ាន់ បូរ័ត្ន បានទៅដណ្តើមកាំភ្លើងពីឈ្មោះ អ៊ិន រតនា ហើយក៏បណ្តាលឲ្យប៉េអឹម អ៊ិន រតនា ត្រូវ ២គ្រាប់ ស្លាប់នៅកន្លែងកើតហេតុតែម្តង។
សូមរម្លឹកថា ជនសង្ស័យ រ៉ាន់ បូរ័ត្ន ស្ថិតក្នុងចំណោមជនសង្ស័យ ២នាក់ ដែលប៉េអឹមខេត្តកោះកុងបានឃាត់ខ្លួន ពាក់ព័ន្ធនឹងករណីបាញ់សម្លាប់លោក ឈុត វុទ្ធី ប្រធានអង្គការការពារធនធានធម្មជាតិ និងលោក អ៊ិន រតនា មន្ត្រីកងរាជអាវុធហត្ថ ឬប៉េអឹម ខេត្តកោះកុង កាលពីថ្ងទី២៦ មេសា ២០១២៕
