គណបក្សសង្រ្គោះជាតិគ្រោងធ្វើពិធីបង្សុកូលដល់វិញ្ញាណក្ខន្ធជនរងគ្រោះថ្ងៃទី០៥-០៦ កក្កដា ១៩៩៧
Cambodia News
ភ្នំពេញ៖ គណបក្សសង្រ្គោះជាតិបានឲ្យដឹងថា ខ្លួនគ្រោងនឹងរៀបចំធ្វើពិធីបុណ្យបង្សុកូល និងរាប់បាត្រព្រះសង្ឃចំនួន១៦អង្គ ដើម្បីគោរពវិញ្ញាណក្ខន្ធដល់ជនរងគ្រោះដែលបាត់បង់ជីវិតក្នុង ព្រឹត្តិការណ៍ថ្ងៃទី០៥-០៦ខែកក្កដា ឆ្នាំ១៩៩៧។
តាមសេចក្តីជូនដំណឹងរបស់គណបក្សសង្រ្គោះជាតិចុះថ្ងៃទី០៥ ខែកក្កដា នេះ ពិធីបុណ្យបង្សុកូលនោះ នឹងប្រព្រឹត្តធ្វើនៅថ្ងៃសៅរ៍ ទី០៦ ខែកក្កដា ឆ្នាំ២០១៣ វេលាម៉ោង៨ព្រឹក នៅទីស្នាក់ការកណ្តាលគណបក្សសង្រ្គោះជាតិ ផ្ទះលេខ៥៧៦ ផ្លូវជាតិលេខ២ ក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
គួររំលឹកថា ព្រឹត្តិការណ៍ថ្ងៃទី០៥-០៦ ខែកក្កដា ឆ្នាំ១៩៩៧ គឺជាព្រឹត្តិការណ៍នៃការវាយប្រយុទ្ធគ្នាមួយកណ្តាលរាជធានីភ្នំពេញ រវាងកងទ័ពដែលស្មោះត្រង់នឹងសម្តេចក្រុមព្រះ នរោត្តម រណប្ញទ្ធិ កាលជានាយករដ្ឋមន្រ្តីទី១ និងកងទ័ពរបស់សម្តេចនាយករដ្ឋមន្រ្តី ហ៊ុន សែន កាលជានាយករដ្ឋមន្រ្តីទី២។ ព្រឹត្តិការណ៍នាពេលនោះធ្វើឲ្យមានការយល់ ខុសគ្នា ដោយក្រុមម្ខាងចាត់ទុកថា ជាព្រឹត្តិការណ៍ប៉ះទង្គិចគ្នាមួយហើយក្រុមម្ខាងទៀតចាត់ទុកថា វាគឺជារដ្ឋប្រហារ។
ប៉ុន្តែទោះជាយ៉ាងណាក៏ដោយ សម្រាប់ការរៀបចំធ្វើពិធីបង្សុកូលរបស់គណបក្សសង្រ្គោះជាតិនាថ្ងៃ ទី៦ កក្កដា ស្អែកនេះ លោក ផៃ ស៊ីផាន អ្នកនាំពាក្យអង្គភាព និងប្រតិកម្មរហ័ស នៃទីស្តីការគណៈរដ្ឋមន្រ្តីបានចាត់ទុកថា នោះគ្រាន់តែជាទង្វើរបស់ពួកឧទ្ទាមប៉ុណ្ណោះ ដោយមិនមានទិសដៅធ្វើយ៉ាងណាដើម្បីឲ្យមានការរួបរួមគ្នា និងឯកភាពជាតិនោះឡើយ៕