រថយន្តកុងតឺន័រ បើកបុកម៉ូតូ បណ្ដាលឲ្យបុរសម្នាក់ស្លាប់ និង ២នាក់រងរបួស
Cambodia News
ភ្នំពេញ៖ កាលពីម៉ោង២៣និង២០នាទីយប់ ថ្ងៃទី២២ ខែមិថុនា បុរសម្នាក់ស្លាប់ភ្លាមៗនៅនឹងកន្លែង ២នាក់ទៀតរងរបួស ខណៈកំពុងជិះម៉ូតូមួយគ្រឿងឌុបគ្នា ត្រូវរថយន្តកុងតឺន័របុកពេញទំហឹង ស្ថិតលើកំណាត់ផ្លូវវ៉េងស្រេង ស្ថិតក្នុងភូមិត្រពាំងខ្លឹង សង្កាត់ចោមចៅ ខណ្ឌពោធិ៍សែនជ័យ។
ប្រភពព័ត៌មានពីសមត្ថកិច្ចបានឲ្យដឹងថា សាកសពបុរសរងគ្រោះឈ្មោះ ជា វ៊ិត អាយុ៣០ឆ្នាំ មុខរបរ ជាជាងផ្សារដែក មានស្រុកកំណើត ភូមិត្រពាំងរកា ឃុំអង្កាញ់ ស្រុកព្រៃកប្បាស់ ខេត្តតាកែវ។ មុនពេលកើតហេតុ រថយន្តកុងតឺន័រពណ៌ស ពាក់ស្លាកលេខ ព្រះសីហុន 3A-0463 បើកបរដោយបុរសម្នាក់ តាមបណ្តោយផ្លូវវេងស្រេង ក្នុងទិសដៅកើតទៅលិច លុះទៅដល់ចំណុចកើតហេតុ ក៏បោះពួយយ៉ាងលឿនទៅបុកម៉ូតូសង់កូរ៉េ ១គ្រឿង ពណ៌ក្រហម ពាក់ស្លាកលេខ ថ-៤០៥៦ ភព១ ជិះគ្នា៣នាក់ចំពីមុខពេញទំហឹង បណ្តាលឲ្យបុរសទាំង៣នាក់ ម្នាក់ស្លាប់ ម្នាក់រងរបួសធ្ងន់ និងម្នាក់ទៀតរងរបួសស្រាល។
ក្រោយពេលកើតហេតុ សពជនរងគ្រោះ សមត្ថកិច្ចទាក់ទងទៅក្រុមគ្រួសារ ឲ្យមកទទួលយកទៅធ្វើបុណ្យតាមប្រពៃណី ចំណែករថយន្តនិងម៉ូតូ ត្រូវសមត្ថកិច្ចយកទៅរក្សាទុកនៅការិយាល័យនគរបាលចររាចរណ៍ជើងគោក រាជធានីភ្នំពេញ ដើម្បីធ្វើការដោះស្រាយ៕ ហេង នាង
