លោក ជុំ ម៉ី ចូលបំភ្លឺតុលាការ ជុំវិញពាក្យប្ដឹងលោក កឹម សុខា
Cambodia News
ភ្នំពេញ៖ នាព្រឹកថ្ងៃចន្ទទី ២៤ ខែ មិថុនា នេះ តាមការគ្រោងទុកលោក ជុំ ម៉ី អតីតអ្នករួចរស់ជីវិតពីគុកទួលស្លែង នឹងចូលបំភ្លឺតំណាង អយ្យការសាលាដំបូងរាជធានីភ្នំពេញនា ជុំវិញបណ្ដឹងប្ដឹងលោក កឹម សុខា ប្រធានស្ដីទីគណបក្សសង្គ្រោះជាតិ ពីបទបរិហាកេរ្តិ៏ជាសាធារណៈ ។
យោងតាមពាក្យបណ្ដឹងរបស់លោក ជុំ ម៉ី ដែលបញ្ជូនទៅកាន់តុលាការកាលពីថ្ងៃទី១៤ មិថុនា អតីតអ្នកទោសគុកទួលស្លែងនៃរបបខ្មែរក្រហមរូបនេះបានទាមទារឲ្យលោក កឹម សុខា ផ្ដល់រំណងមកឲ្យលោក ដែលលោក អះអាងថា នឹង យកទៅបង្សុកូលឲ្យវិញ្ញាណក្ខន្ធអ្នកស្លាប់ក្នុងរបបខ្មែរក្រហមនោះ ចំនួន១ពាន់ដុល្លារ សហរដ្ឋអាមេរិក ទាក់ទងដល់ការអត្ថាធិប្បាយរបស់លោក កឹម សុខា ដែលថា ទិដ្ឋភាពឃោរឃៅនៅគុកទួលស្លែង ជារឿងប្រឌិតដែលរៀបចំដោយវៀតណាម ។
ជាមួយគ្នាលោក កឹម សុខា ក៏ត្រូវបានតុលាការកោះហៅឲ្យចូលខ្លួនបំភ្លឺចំពោះសំណុំរឿងនេះ នាថ្ងៃទី ២៧ ខែ មិថុនា ខាងមុខ នេះផងដែរ ៕
