ខឹងតាមស្រឡាញ់មិនបាន តាមចាក់របួសធ្ងន់
Cambodia News
កំពង់ចាម ៖ ភ្លើងស្នេហ៍ឆាបឆេះ ខ្លាំងធ្វើឱ្យបុរសម្នាក់ ដែលតាមស្រឡាញ់ស្ត្រីកូន៤ ប៉ុន្តែត្រូវស្ត្រីនោះបដិសេធ ទើបធ្វើឱ្យបុរសលង់ស្នេហ៍ ខឹងសម្បាក៏យកដែកឆាប ចាក់មកលើស្ត្រីដែល ខ្លួនស្រឡាញ់ស្ទើរលេប នេះបណ្ដាល ឱ្យរងរបួសមិនតិច ជាង១០កន្លែងឡើយ ។
ជនសង្ស័យខាងលើមានឈ្មោះ ស្រី ឆៃគា ហៅអួងអាយុ២៩ឆ្នាំ នៅលីវ រស់នៅក្នុងភូមិសមរម្យ ឃុំរកាពប្រាំ ស្រុកត្បូងឃ្មុំ ។ចំណែកស្ត្រីរងគ្រោះមានឈ្មោះម៉ន ម៉ានី អាយុ៤០ឆ្នាំ រស់នៅភូមិវាលរីខាងកើត ឃុំស្វាយទាប ស្រុកចំការលើ ។
ហេតុការណ៍នេះ បានកើតឡើង កាលពីវេលាម៉ោង៤ និង៣០នាទីរសៀលថ្ងៃទី១៩ មិថុនា នៅចំណុចផ្លូវបំបែកត្រើងភូមិខែលជ័យ ឃុំអូរស្វាយ ស្រុកកំពង់សៀម ហើយបុរសបង្ករបួសស្នាម នេះក៏ត្រូវបានប៉ូលិស ចាប់ខ្លួនភ្លាមៗដែរ ។
មុនពេលកើតហេតុ ស្ត្រីរងគ្រោះបានទូរស័ព្ទ ណាត់ជួបគ្នាជាមួយ នឹងបុរសឈ្មោះអួងនៅម្ដុំផ្លូវបំបែកត្រើង ដើម្បីនិយាយគ្នា ឱ្យដាច់ស្រេច និងឱ្យបោះបង់ការតាមស្រឡាញ់នេះ ។ ផ្ទុយទៅវិញបុរសនេះ បានបបួលស្ត្រី រងគ្រោះឱ្យរត់ចោលប្ដី និងកូន ប៉ុន្តែស្ត្រីរងគ្រោះប្រកែក ទើបកើតជាហិង្សា បែបនេះតែម្ដងគឺបុរសនេះ យកដែកឆាប ចាក់មកលើស្ត្រីរងគ្រោះ ទាំងកំរោល ។ ភ្លាមៗនោះត្រូវបាន សមត្ថកិច្ចអន្តរាគមន៍ចាប់បញ្ជូនមក អធិការដ្ឋាននគរបាលស្រុកកំពង់សៀម ដើម្បីចាត់ការតាមច្បាប់ ៕
