អតីតអ្នកបឹងកក់ បរាជ័យជាថ្មី ក្នុងការសុំដំណោះស្រាយពីសាលាក្រុង
Cambodia News
ភ្នំពេញ៖ នៅព្រឹកថ្ងៃទី១៩ មិថុនា នេះ អតីតអ្នកបឹងកក់ប្រមាណជា១០០នាក់ ដែលរងការបណ្តេញចេញ បានចេញមុខតវ៉ាជាថ្មីទៀតនៅមុខសាលារាជធានីភ្នំពេញ ដើម្បីទាមទារសំណងសមរម្យ ខណៈការបណ្តេញចេញនោះ មិនទទួលបាន សំណងតាមការសន្យា។
បន្ទាប់ពីមានការតវ៉ារយៈជាងមួយម៉ោង មន្ត្រីសាលាក្រុង បានអនុញ្ញាតឲ្យតំណាងពលរដ្ឋ៥នាក់ចូលចរចា តែមិនបានលទ្ធផលអ្វីនោះទេ គ្រាន់តែមន្ត្រីប្រាប់ថា ឲ្យពលរដ្ឋទាំងនោះរៀបចំជាក្រុមឲ្យច្បាស់ថា ពិតជាពលរដ្ឋដែលរងការបណ្តេញចេញមែនឬទេ។
ក្រុមអ្នកតវ៉ា បានយំរៀបរាប់ពីទុក្ខលំបាករបស់ពួកគេ ដោយរិះគន់ថា មន្ត្រីសាលាក្រុងមិនមានទំនួលខុសត្រូវក្នុងការដោះស្រាយបញ្ហាជូន ពលរដ្ឋរងទុក្ខវេទនា ហើយចេះតែសន្យាខ្យល់តែប៉ុណ្ណោះ។
បន្ទាប់ពីទទួលចម្លើយពីមន្ត្រីសាលាក្រុងបែបនេះហើយ ពលរដ្ឋអះអាងថា ពួកគេរង់ចាំដល់ថ្ងៃចន្ទ សប្តាហ៍ក្រោយ បើមិនមានមន្ត្រីណាមួយចុះទៅដោះស្រាយទេ ពួកគេនឹងតវ៉ាតទៅទៀត៕