តំណាងសហជីពកម្មករប្រតិកម្មចំពោះគម្រោងស្នើសុំឲ្យកម្មករបញ្ឈប់ធ្វើបាតុកម្ម
បន្ទាប់ពីថៅកែរោងចក្រនានា មានគម្រោងផ្ញើលិខិតទៅលោកនាយករដ្ឋមន្ត្រី ហ៊ុន សែន សុំឲ្យបញ្ចប់រឿងកម្មករធ្វើបាតុកម្មខុសច្បាប់បន្តទៅទៀត នៅថ្ងៃទី២៥ មេសា តំណាងសហជីពកម្មករនានានៅកម្ពុជា បានសម្ដែងការមិនពេញចិត្តចំពោះសេចក្ដីអំពាវនាវ និងគម្រោងដាក់ញត្តិរបស់សភាពាណិជ្ជកម្មកម្ពុជា ដែលបានសុំឲ្យរដ្ឋាភិបាលកម្ពុជា បញ្ឈប់កម្មករកុំឲ្យធ្វើបាតុកម្ម ឬកូដកម្មបន្តទៅទៀត។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា បាននិយាយថា ការធ្វើបាតុកម្ម និងកូដកម្ម មិនអាចបញ្ចប់ទៅដោយងាយៗនោះទេ ព្រោះនិយោជករោងចក្រកាត់ដេរមិនបានគោរពច្បាប់ការងារ និងសិទ្ធិកម្មករ។ តែបើចង់បញ្ចប់សកម្មភាពទាំងនេះនិយោជកត្រូវតែធានាឲ្យបានថា មិនត្រូវធ្វើទុក្ខបុកម្នេញ និងរំលោភលើសិទ្ធិការងារកម្មករតទៅទៀត។
ចំពោះបញ្ហានេះលោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា បានឲ្យដឹងថា ការដឹកនាំបាតុកម្ម និងកូដកម្ម ដែលដឹកនាំដោយក្រុមសហជីព គឺនិយោជកមានសិទ្ធិគ្រប់គ្រាន់ក្នុងការប្ដឹង ប្រសិនបើរកឃើញថាមានកំហុស ប៉ុន្តែលោកយល់ថា និយោជកមិនអាចប្រឈមនឹងកម្មករបាន ដោយរឿងហេតុកើតចេញពីនិយោជកទាំងនោះមិនបានគោរពសិទ្ធិ និងច្បាប់ការងារកម្ពុជា។
ទាក់ទងរឿងធ្វើបាតុកម្ម និងកូដកម្មញឹកញាប់កន្លងមកនេះ លោក អាត់ ធន់ ឲ្យដឹងថា ពាក្យបណ្ដឹងតវ៉ារបស់កម្មករដែលបានប្ដឹងទៅក្រុមប្រឹក្សា អាជ្ញាកណ្ដាល គឺ ៩០ភាគរយ កម្មករបានឈ្នះក្ដី។ ដូច្នេះ លោកថា ហេតុផលនេះអាចបញ្ជាក់បានថា កម្មករ និងក្រុមការងារសហជីពមិនមែនធ្វើការបាតុកម្ម និងកូដកម្មដោយពុំមានមូលហេតុច្បាស់លាស់នោះទេ៕
