រដ្ឋសភាចាប់ផ្តើមបើកសម័យប្រជុំលើកទី៨ នីតិកាលទី៤
ភ្នំពេញ: នៅព្រឹកថ្ងៃទី២៥ មេសា ២០១២ សមាជិករដ្ឋសភាចំនួន ១០៤ រូប ក្នុងចំណោមសមាជិករដ្ឋសភាសរុប ១២៣ រូប បានចូលរួមបើកសម័យប្រជុំ លើកទី៨ នីតិកាលទី៤ ក្រោមអធិបតីភាពសម្តេចហេង សំរិន ប្រធានរដ្ឋសភា។
របៀបវារៈនៃកិច្ចប្រជុំរដ្ឋសភា នៅព្រឹកនេះ រួមមាន៖
១- ព្រះរាជសារព្រះករុណា ព្រះបាទសម្តេចព្រះបរមនាថនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជាជូនសម័យប្រជុំរដ្ឋសភាលើកទី៨ នីតិកាលទី៤។
២-របាយការណ៍ស្តីពីសកម្មភាពរបស់រដ្ឋសភាចន្លោះសម័យប្រជុំលើកទី៧ និងលើកទី៨ នីតិកាលទី៤។
៣-ការបោះឆ្នោតជ្រើសតាំងលោកជំទាវ ឃួន សុដារី ជាអនុប្រធានទី២ នៃរដ្ឋសភា។
៤- ការបោះឆ្នោតជ្រើសតាំងលោក ពៅ សាមី ជាសមាជិកគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា និងបោះឆ្នោតជ្រើសតាំងលោកស្រី អ៊ុន សុគន្ធា ជាសមាជិកគណៈកម្មការមហាផ្ទៃ ការពារជាតិ អង្កេត បោសសម្អាត និងមុខងារសាធារណៈ។
៥-ការជ្រើសតាំងសមាជិកព្រឹទ្ធសភា នីតិកាលទី៣ ចំនួន ១ រូប។
កិច្ចប្រជុំរដ្ឋសភានៅព្រឹកនេះ ក៏មានការអញ្ជើញចូលរួមពីសម្តេចនាយករដ្ឋមន្ត្រី ហ៊ុន សែន ដែលជាអ្នកតំណាងរាស្ត្រមណ្ឌលខេត្តកណ្តាលផងដែរ៕