នគរបាលប្រឆាំងកុប្បកម្មបង្រ្កាបបាតុកម្មនៅទួកគី
នគរបាលប្រឆាំងកុប្បកម្មទួកគី បានធ្វើ ការបង្រ្កាបក្រុមបាតុកររាប់ពាន់នាក់នៅទីលាន Taksim កាលពីព្រឹកព្រលឹម។ ក្រុមនគរបាលបានហាមមិនឲ្យមនុស្សចូលទៅកាន់ទីលាននេះពេញមួយថ្ងៃ ដោយប្រើកាណុងបាញ់ទឹក គ្រាប់កាំភ្លើងជ័រ និងឧស្ម័នបង្ហូរទឹកភ្នែក។
ក្រុម អ្នកតវ៉ាបានវាយប្រហារលើក្រុមនគរបាលវិញដោយ ប្រើផាវ ដុំថ្ម និងដបស្រា។ លោកនាយករដ្ឋមន្ត្រី Recep Tayep Erdogan បានប្រកាសថាលោកមិនអាចអត់ធ្មត់ជាមួយក្រុមបាតុករបានទៀតទេ។
ទោះ ជាយ៉ាងនេះក្តីនៅពេលល្ងាចនគរបាលហាក់បីដូចជាអនុញ្ញាតឲ្យក្រុម អ្នកតវ៉ារាប់ពាន់នាក់ចូលទៅក្នុងទីលាននោះវិញ បន្ទាប់មកនគរបាលបានចាប់ផ្តើមបាញ់ឧស្ម័នបង្ហូរទឹកភ្នែកទៅកាន់ ហ្វូងមនុស្ស ហើយការប៉ះទង្គិចគ្នាក៏កាន់តែមានភាពតានតឹងឡើង។
អភិបាល ក្រុងអ៊ីស្តាន់ប៊ុលមានប្រសាសន៍ថា នគរបាលនឹងបន្តសកម្មភាពរបស់ខ្លួនរហូតដល់ក្រុមអ្នកតវ៉ាចាកចេញ អស់។ បើតាមរូបភាពផ្សាយផ្ទាល់តាមទូរទស្សន៍បង្ហាញថា យ៉ាងហោចណាស់មានភ្លើងឆេះយ៉ាងធំមួយនៅក្បែរកន្លែងតវ៉ា៕ (Radio Australia)