ចិនបញ្ជូននាវាទៅសេនកាគូ ក្រោយទស្សនកិច្ចរបស់នាយករដ្ឋមន្ត្រីជប៉ុន
រដ្ឋាភិបាលចិនបានបញ្ជូននាវាល្បាតបី គ្រឿង ទៅក្នុងដែនទឹកជាប់ជម្លោះ ជាមួយជប៉ុន នៅថ្ងៃព្រហស្បតិ៍នេះ ដើម្បីជាចម្លើយប្រឆាំងតបទៅនឹងទស្សនកិច្ចរបស់លោកនាយក រដ្ឋមន្ត្រីជប៉ុន ស៊ីនហ្សូ អាបេ ដែលបានធ្វើដំណើរទៅជួបសួរសុខទុក្ខឆ្មាំសមុទ្ទ នៅតំបន់ក្បែរប្រជុំកោះសេនកាគូ។
ប្រតិកម្មដូចផ្លេកបន្ទោរ ! នៅវេលាម៉ោង៩និង៣០នាទីព្រឹក នាវាចិនបានចូលដល់ដែនទឹកជាប់ជម្លោះ ក្នុងចម្ងាយប្រមាណតែ២២គ.ម.ប៉ុណ្ណោះ ពីប្រជុំកោះគ្មានមនុស្សរស់នៅសេនកាគូ ដែលស្ថិតក្រោមរដ្ឋាបាលជប៉ុន តែចិនទាមទារយកក្រោមឈ្មោះថាទាវយូ។
ការបញ្ជូននាវាបីគ្រឿងទៅបញ្ឈរអស់ពេលបីម៉ោង នៅក្នុងតំបន់ជាប់ជម្លោះនេះ ព្រោះចិនពិតមិនអាចឈរនៅស្ងៀម មើលជប៉ុនគ្រប់គ្រងដែនកោះជាប់ជម្លោះ ដោយស្រួលៗឡើយ។ ម្សិលមិញ លោកនាយករដ្ឋមន្ត្រីជប៉ុន បានអញ្ជើញទៅបំពេញទស្សនកិច្ចនៅ កោះ អ៊ីស្ហ៊ីហ្កាគី ជាប់ប្រជុំកោះសេនកាគូ។
បើគេជឿតាមទូរទស្សន៍ជាតិជប៉ុន នេះជាលើកទីមួយ តាំងពី៤៨ឆ្នាំមកដែលនាយករដ្ឋមន្ត្រី អញ្ជើញទៅដល់កោះដាច់ស្រយាលអ៊ីស្ហ៊ីហ្កាគី (ស្ថិតនៅចម្ងាយ២ពាន់គីឡូម៉ែត្រ ពីរាជធានីតូក្យូ និងមិនដល់២០០គ.ម. ផង ពីកោះតៃវ៉ាន់) ដើម្បីជួបសួរសុខទុក្ខឆ្មាំសមុទ្ទ អ្នកល្បាតការពារប្រជុំកោះសេនកាគូ ជាងសែសិបនាក់។ ជាដំណាក់កាលឃោសនាបោះឆ្នោតព្រឹទ្ធសភាផង លោកនាយករដ្ឋមន្ត្រីស៊ីនហ្សូ អាបេ ដែលល្បីថាជាអ្នកជាតិនិយមជប៉ុន បំផុតនេះ បានប្រកាសជាថ្មីម្តងទៀត បន្តនយោបាយការពារនិងថែរក្សាដែនដី ដែនទឹក ដែនអាកាស ថាប្រជុំកោះសេនកាគូ គឺជាដែនអធិបតេយ្យពិតៗរបស់ជប៉ុន ទាំងក្នុងប្រវត្តិសាស្ត្រ និងទាំងតាមច្បាប់អន្តរជាតិ។
តាំងពីរដ្ឋាភិបាលជប៉ុនបានទិញកោះបីក្នុងចំណោមកោះទាំង៥នៃប្រជុំ កោះសេនកាគូ មកធ្វើជាសម្បត្តិរដ្ឋ នៅខែកញ្ញាឆ្នាំ២០១២មក ទំនាក់ទំនងចិននិងជប៉ុន បានធ្លាក់ចុះស្ទើរដល់បាត។ ចិនតែងបញ្ជូននាវាល្បាត ជាញឹកញាប់ និងម្តងម្កាលជាយន្តហោះទៅកាន់ដែនទឹកជាប់ជម្លោះ ដើម្បីសម្តែងការប្រឆាំង។ ឯនាយករដ្ឋមន្ត្រីជប៉ុន បានព្រមានប្រើកម្លាំងយោធាផង ប្រសិនបើចិនជ្រុលរំលងគំនូសព្រំដែន និងមិនទាន់បានជួបពិភាក្សាទ្វេភាគីអ្វីជាមួយសមភាគីចិនសោះ តាំងពីបានទទួលតំណែងមក៕ដោយ អៀង សុខម៉ិញ (RFI)
