ស្ត្រីម្នាក់ ខណៈកំពុងជិះម៉ូតូ ត្រូវរថយន្តបុកអូសជាង ១០ម៉ែត្រ បណ្តាលឲ្យស្លាប់
Cambodia News
ភ្នំពេញ ៖ នាវេលាម៉ោង១១និង៤៣នាទីថ្ងៃទី ១០ មិថុនា នេះ ស្ត្រីម្នាក់ខណៈ កំពុងជិះម៉ូតូ ហើយត្រូវបុរសម្នាក់បើករថយន្តបុកពេញទំហឹង បណ្តាលឲ្យស្លាប់បាត់បង់ជីវិត នៅកន្លែងកើតហេតុ ស្ថិតនៅតាមដងផ្លូវម៉ុងឬទ្ធី ត្រង់ចំណុចភូមិបាយ៉ាប សង្កាត់ភ្នំពេញថ្មី ខណ្ឌសែនសុខ។
យោងតាមសេចក្តីរាយការណ៍ពីកន្លែងកើតហេតុបានឲ្យដឹងថា ស្ត្រីដែលស្លាប់ក្នុងហេតុការណ៍ខាងលើនេះមានឈ្មោះ ហង្ស មូនីកា អាយុ២២ ឆ្នាំ ស្នាក់នៅសង្កាត់បឹងកក់ទី ២ ខណ្ឌទួលគោក ជិះម៉ូតូមួយគ្រឿងម៉ាកស្មាស ពណ៌ខ្មៅ ពាក់ស្លាកលេខភ្នំពេញ 1AK 9550 ធ្វើដំណើរតាមបណ្តោយផ្លូវម៉ុងរិទ្ធី ក្នុងទិសដៅពីលិចទៅកើត ខណៈជិះមកដល់ចំណុចកើតហេតុខាងលើនេះ មានបុរសម្នាក់ជាមន្ត្រីផ្នែកគណនេយ្យក្រសួងមហាផ្ទៃ បើករថយន្តរ៉ងរ៉ូវែ មួយគ្រឿងពណ៌ស ពាក់ស្លាកលេខភ្នំពេញ 2V 6565 បញ្ច្រាសទិសជាមួយនឹងម៉ូតូស្ត្រីរងគ្រោះ បានរេចង្កូតមកបុកស្ត្រីរងគ្រោះកំពុងជិះម៉ូតូចំពីមុខពេញទំហឹង ហើយរថយន្តរ៉ង់រ៉ូវែ មិនឈប់ បានបន្ថែមល្បឿនរត់គេចខ្លួនដោយបានអូស ម៉ូតូនឹងស្ត្រីរងគ្រោះជាង ១០ ម៉ែត្រ បណ្តាលឲ្យស្ត្រីជាម្ចាស់ម៉ូតូត្រូវរងរបួសរហូតស្លាប់បាត់បង់ជីវិត នៅក្នុងថ្លុកឈាម នឹងកន្លែងកើតហេតុភ្លាមៗតែម្តង ។
ក្រោយកើតហេតុ រថយន្តបង្កនឹង អ្នកបើកបររថយន្ត ត្រូវបានសមត្ថកិច្ចឃាត់បានភ្លាមៗ នឹងធ្វើការវាស់វែងអូសយកទៅរក្សាទុកនៅការិយាល័យចរាចរណ៍ ជើងគោករាជធានីភ្នំពេញរង់ចាំដោះស្រាយតាមផ្លូវច្បាប់៕
