បុរសម្នាក់ បើករថយន្តទៅបុកម៉ូតូពេញទំហឹង បណ្តាលឲ្យមនុស្ស៣នាក់របួសធ្ងន់
Cambodia News
ភ្នំពេញ៖ កាលពីម៉ោង១និង៤០នាទីរំលងអធ្រាត្រឈានចូលថ្ងៃទី០៨ ខែមិថុនានារី២នាក់ និងបុរសម្នាក់ រងរបួសធ្ងន់ ខណៈដែលពួកគេបើកម៉ូតូ ហើយត្រូវរថយន្តធុនត្រា បុកពេញទំហឹង ឋិតនៅចំណុចផ្លូវប្រសព្វព្រះមុនីវង្ស ក្នុងសង្កាត់មនោរម្យ ខណ្ឌ៧មករា ។
ប្រភពព័ត៌មានពីសមត្ថកិច្ចបានឲ្យដឹងថា នៅមុនពេលកើតហេតុ គេឃើញបុរសម្នាក់និងនារី២នាក់ ជិះម៉ូតូគុបជ្រុងពណ៌ទឹកប៊ិច ពាក់ស្លាកលេខ ភ្នំពេញ 1AO- 5490 តាមផ្លូវកម្ពុជា ក្នុងទិសដៅពីលិចទៅកើត លុះបើកដល់ចំណុចផ្លូវប្រសព្វ ជាមួយផ្លូវព្រះមុនីវង្ស ក៏ត្រូវរថយន្តធុនត្រា ពណ៌ស មិនស្គាល់ស្លាកលេខ បើកបុកពេញទំហឹង បណ្តាលឲ្យនារី២នាក់ និងបុរសម្នាក់រងរបួសធ្ងន់។ ចំណែករថយន្តបង្កបានបើករត់គេបាត់។
ក្រោយពេលកើតហេតុ ជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យ។ ចំណែកម៉ូតូជនរងគ្រោះ ត្រូវបានយកទៅរក្សាទុកនៅអធិការដ្ឋាននគរបាលខណ្ឌ៧មករា ៕
